Magani kërkon pikë në kryeqytet

Shkumbini/Trajneri beson në rezultat pozitiv ndaj Tiranës
Atmosfera e fitores me Vllazninë ka vazhduar gjatë në Peqin, pasi
Shkumbini jo vetëm mposhti skuadrën që kryeson kampionatin, por bëri
një paraqitje të shkëlqyer përballë publikut të saj. E kënaqur nga kjo
fitore padyshim që ishte edhe kryesia e klubit, së bashku me trajnerët
Magani e Branica, të cilët pas takimit janë ftuar nga futbollisti i skuadrës,
Alfred Salliu, në ceremoninë e tij të dasmës. Mesa duket, fitorja ndaj
shkodranëve ka qenë dhurata më e këndshme që mund t’i bënin shokët
Salliut në këtë ditë të shënuar. Futbollistët
kanë pasur një ditë pushim
dhe dje i janë kthyer stërvitjes. Siç
dihet, të mërkurën peqinasit do të
kenë një tjetër sfidë të vështirë,
teksa do të përballen me Tiranën e
Agustin Kolës në kryeqytet. Në
sfidën e parë midis këtyre dy
skuadrave, Shkumbini zhvilloi një
ndeshje dinjitoze, duke arritur t’i
frenonte bardheblutë me një barazim
pa gola. Mirëpo, nisur nga takimi
i së mërkurës, vështirësia paraqitet më e madhe për vetë faktin se
ekipi kryeqytetas është në superformë, gjë që e tregoi edhe ndaj
Dinamos. Pikërisht kësaj i druhet edhe trajneri Magani. “Mendoj se
fitorja me Vllazninë tashmë është harruar plotësisht dhe e gjithë vëmendja
jonë është përqendruar te sfida e radhës. Normalisht që kjo
ndeshje ka specifikën e vet, pasi dihen vlerat e Tiranës. Mendoj se
Tirana ka shumë futbollistë që dinë të bëjnë diferencën, por kjo s’do të
thotë që ne i druhemi asaj, pasi mjaft
herë e kemi surprizuar brenda ne
fushën e saj”. Magani i referohet
barazimeve fantastike 2-2 dhe 4-4
të arritura disa sezone më parë në
kryeqytet. “U kam kërkuar futbollistëve
të mi të jenë të përqendruar.
Rezultatin ia lëmë fushës. Unë i përmbahem
metodës sime të punës dhe
kërkoj që ndeshjet të merren një nga
një”, përfundon kreu i pankinës së
Shkumbinit, peqinasi Magani.
Futbollistët e Shkumbinit do të kenë një motiv më shumë për t’u mobilizuar
maksimalisht ndaj Tiranës, pasi dje atyre u janë shpërndarë sipas
kontratës të gjitha këstet e dyta. Mesa duket, kryesia e klubit ka mbetur
mjaft e kënaqur nga paraqitja e lojtarëve dhe sidomos nga fitorja me
Vllazninë. Presidenca e klubit peqinas është nga më korrektet në lidhje
me shlyerjet e detyrimeve ndaj lojtarëve dhe në disa raste janë vënë
në dispozicion të tyre edhe premio sipas objektivave. F.Ahmeti
Panorama sport