Peqinasit duan të ndalin kryesuesit

Stafi peqinas shpreson te triumfi ndaj Vllaznisë në ndeshjen e radhës
Ekipi i Shkumbinit pas një dite pushimi do t’u rikthehet seancave stërvitore
ditën e sotme për t’u përgatitur për ndeshjen e javës, që do ta
zhvillojë me Vllazninë. Trajneri i dytë peqinas, Sokol Branica, u shpreh
për “Panorama Sport” se, përgatitja e fundit peqinasve u zhvillua
paraditen e së shtunës në Ulqin. “I gjithë grupi i lojtarëve është lënë
pushim jo vetëm për faktin e ngarkesës së lartë, por edhe për të
takuar familjarët, të cilët nuk i kishin parë për afro 10 ditë, për shkak
të qëndrimit në tokën malazeze. Kushtet në të cilat zhvilluam këtë
përgatitore ishin mjaft të mira. Edhe pse ishin mjaft skuadra të Superiores
në këtë vend duke zhvilluar fazën përgatitore, ne nuk e ndjemë
aspak mbipopullimin, sepse hoteli ku qëndruam ishte i pajisur
me disa fusha e terrene sportive”, u shpreh zëvendëstrajneri Sokol
Branica. Shkumbini në këtë fazë përgatitore zhvilloi edhe tri takime
miqësore, një me Lushnjen, që e fitoi me rezultatin 3-0 dhe dy tjera
me Bylisin, ku në njërën barazuan me rrjeta të paprekura dhe tjetrën
e fituan me rezultatin 2-1. Në lidhje me këto takime zv/trajneri u shpreh
shumë entuziast për formën që treguan djemtë e tij në fushën e lojës
si edhe për rezultatet pozitive. “Për ne e rëndësishme ishte që lojtarët
u rikthyen në formën më e mirë, duke e gjetur kështu plot pesë herë
rrugën drejt rrjetës. Duke parë këtë gjendje, pa frikë mund të them se
ndaj Vllaznisë do të dalim triumfues nga fusha e lojës, duke pasur
parasysh që ndeshja zhvillohet në fushën tonë. Mendoj se që të dyja
ekipet kanë potencialin e duhur dhe mundësinë reale për ta fituar
përballjen. Megjithatë, ne do të mundohemi të bllokojmë sulmuesit e
tyre kryesorë Sinanin dhe Sukajn. Këtë gjë e kemi kërkuar me ngulm
gjatë qëndrimit tonë në Ulqin dhe kemi orientuar lojtarët, që të luajnë
në grup e të tregohen sa më altruistë” , përfundon prononcimin e tij
ndihmësi i Maganit, Sokol Branica. Fatmir Ahmeti
Panorama sport