Shameti, garancia e mbrojtjes peqinase

Mbrojtësi gjirokastrit Ylli Shameti e cilëson fitoren e Shkumbinit thjesht një detyrë
Mbrojtësi 24 vjeçar Ylli Shameti, ndonëse është nga të fundit futbollistë që iu bashkua Shkumbinit në merkaton e verës, ka arritur të fitojë besimin e trajnerit Magani për të zënë vendin e titullarit në formacion, duke i luajtur të plota dy nga tri takimet e para të kampionatit. Paraqitja e tij në ndeshjen e fundit me Teutën në rolin e mbrojtësit të qendrës të Shkumbinit është vlerësuar me nota pozitive. Sipas Shametit, ka qenë mjedisi i ngrohtë që ai ka gjetur në Peqin, si dhe fakti që te Shkumbini gjen dy bashkëqytetarët e vet, Norën e Shenajn, që e kanë ndihmuar shumë. “E ndiej veten mjaft mirë në Peqin në çdo drejtim. Për këtë dua të falënderoj drejtuesit, që më kanë inkurajuar e ma kanë bërë më të lehtë të përshtatem. Kjo më nxit që të stërvitem edhe më shumë, me synimin për të dhënë më të mirën time,” - shprehet mbrojtësi Shameti. Në ndeshjen e fundit me Teutën, nëse kundërshtari nuk arriti për asnjë rast të shfaqej rrezikshëm përpara portës së Llanit, meritë ka edhe mbrojtja me Xhyrën, Pashën, e drejtuar saktë nga Shameti. Në këtë takim ai spikati për veprimet e sakta në thyerjen e sulmeve të kundërshtarit, për sigurinë që i dha repartit të mbrojtjes në çdo moment, duke ditur të organizojë siç duhet, për të marrë më pas edhe iniciativën për organizimin e sulmeve në portën kundërshtare. Fitorja e fundit e ka kënaqur Shametin, por më shumë se kjo ai ka mbetur i kënaqur nga loja që zhvilloi ekipi i tij, ku mbi të gjitha spikati shpirti i garës dhe harmonia e ekipit. Ai e sheh si pozitiv faktin që Shkumbini arrin të shënojë në çdo ndeshje, por edhe e shqetëson fakti që shpërdorohen shumë raste të pastra, siç ndodhi të dielën e kaluar. “Me Teutën bëmë detyrën, fituam. Rezultati i ngushtë 1 0 nuk do të thotë se fituam me vështirësi. Ne patëm epërsi gjatë gjithë lojën, krijuam raste të pastra, pa ditur ta konkretizojmë me gola të tjerë. Fitorja na kënaqi, por duhet ta kishim zgjidhur më shpejt fatin e ndeshjes, për të shmangur tensionin e zakonshëm në fundin e ndeshjes, pasi një gol diferencë nuk ta jep asnjëherë sigurinë e duhur,” - tërheq vëmendjen mbrojtësi i Shkumbinit, Ylli Shameti. Ish futbollisti i Kastriotit, që fazën përgatitore e zhvilloi me ekipin e Partizanit, beson se është bërë një punë e mirë në ekip nën drejtimin e Maganit dhe se ekipi ku ai bën pjesë ka forca për të kaluar çdo kundërshtar, pavarësisht emrit apo kontigjentit që ka. Për të, kjo pasqyrohet më mirë në ndeshjet përpara sportdashësve peqinas, kur synohet vetëm një rezultat, fitorja. “Kemi filluar nga puna në stërvitje për t’u përgatitur për ndeshjen me Besën. E dimë që do të kemi përballë një kundërshtar edhe më të fortë e më të vështirë se ai i Teutës, prandaj dhe angazhimi ynë për këtë ndeshje do të jetë më i madh. Besoj te ky ekip që e pashë të dielën e kaluar, që është i aftë të dalë fitues përballë çdo ekipi, sidomos në fushën e vet. Kemi ditur ta gjejmë rrugën e rrjetës në çdo ndeshje dhe këtë do të kërkojmë edhe në ndeshjen e radhës, të arrijmë objektivin,” - përfundon mbrojtësi gjirokastrit Ylli Shameti.