IGLI TARE

E shanë “shqiptar m...”,Tare konflikt me tifozët


(Derguar me: 25/09/07)

Tribuna
VIP e stadiumit të Bergamos ka shënuar një tjetër episod të shëmtuar,
teksa protagonist ka qenë sulmuesi shqiptar Igli Tare. Gjithçka ka
lindur pas golit të dytë të Atalantës, kur disa tifozë vendas në
gjendje ekstaze kanë shkuar për të sharë dhe pështyrë presidentin
Lotito dhe përfaqësuesit e tjerë të Lacios që ndodheshin në tribunën
VIP. Mes tyre ishte edhe Igli Tare, që duket se ka qenë shënjestra
kryesore. Ka qenë vetëm ndërhyrja e një oficeri të sigurisë që ka
ndaluar shqiptarin t'u vinte duart tifozëve bergamaskë. Lajmi është
bërë i ditur dje nga mediat italiane, ndërkohë që Tare ka sqaruar për
"Gazetën Shqiptare" edhe shkaqet e incidentit. "Kishin një pjesë të
madhe kohe që na shanin dhe na pështynin, por ne as që ua vumë veshin
dhe ishim duke parë ndeshjen", rrëfeu sulmuesi shqiptar. "Nuk pushonin
duke thënë "albanese di merda" (shqiptar m...) e këto gjëra që e kanë
tifozët këtu dhe prandaj u acarova. Pasi Atalanta shënoi golin e dytë
na erdhën përpara tribunës VIP dhe i shtuan thirrjet, duke vazhduar të
pështynin e bërë gjeste. Kjo ishte e gjitha dhe mendoj se ishte një
budallallëk. Megjithatë nuk pati asnjë kontakt fizik mes nesh", bën të
ditur Igli Tare që nga Italia.
Konflikti
Igli
Tare ka qenë në tribunën VIP të stadiumit të Atalantës bashkë me
presidentin Klaudio Lotito. Të veshur me kostume seriozë, ata janë
fokusuar shpesh nga kamerat që transmetonin ndeshjen. Por, për një
pjesë të madhe të kohës ata janë sharë, fyer dhe pështyrë nga ana e
tifozëve bergamaskë. Pas shënimit të golit të dytë të Atalantës, e cila
e fitoi ndeshjen 2-1, 4-5 tifozë kanë dalë përpara dyshes laciale në
një gjendje ekstaze, duke vazhduar më me intensitet sharjet. Shënjestër
është bërë sidomos Igli Tare, të cilin tifozët e kanë fyer me fjalët
"shqiptar m...", gjë që ka sjellë edhe irritimin e shtatlartit
shqiptar. Tare është ngritur të përballej direkt me ta, por në ato
momente ka ndërhyrë një agjent i sigurisë së stadiumit, i cili ka
frenuar që shqiptari të godiste ndonjërin prej tifozëve. "Në fillim as
që e kthyem kokën, por më pas nisën të shanin më keq, pështynin e bënin
gjeste, madje na erdhën edhe te tribuna VIP duke më sharë edhe mua
"shqiptar m.." e gjëra të tilla, prandaj nuk durova. Megjithatë asgjë
nuk ndodhin më tej, pasi nuk patëm kontakt fizik. Ishte thjeshtë një
budallallëk dhe asgjë më shumë", rrëfeu dje Igli Tare. Ndërkohë që nuk
ka munguar as një konflikt mes ish-arbitrit Mazoleni, që i nxorri
gishtin presidentit Lotito. "E pashë, por s'e dija me kë e kishte", tha
Tare.

Tare goditi Mihajloviç se i tha "shqiptar m..."

Igli
Tare është një patriot i vërtetë dhe një gjë e tillë është parë edhe në
vitin 2006, kur Sinisha Mihajloviç tentoi ta quante "shqiptar m.."
gjatë një ndeshje në Kupën e Italisë, Lacio-Inter. Serbi e mori shpejt
kusurin. Pas futjes në dhomat e zhveshjes, Tare e rrahu rëndë, duke
bërë që Mihajloviç të futej në fushë gjithë shenja në pjesën e dytë të
ndeshjes. Vetë Tare pranoi atëherë se kishte mbetur i ofenduar dhe
prandaj e kishte goditur. "Besoj se e mori mësimin", tha atëherë
ish-kapiteni i kombëtares.

Tare në formë, por hyn vetëm në shtesë

Igli Tare ka treguar një formë të shkëlqyer në miqësoren e mesjavës,
megjithatë tekniku Delio Rosi e ka aktivizuar vetëm në shtesë në
ndeshjen e djeshme kundër Kaljarit. Shqiptari u fut në lojë në minutën
e 89-të në vend të Mudingait, vetëm pak sekonda pasi sardët patën
shënuar golin e avantazhit.