Sporti "zhvishet" nga mbrojtja e policisë

MTKRS kërkon të largojë forcat e rendit nga ambientet sportive, duke u lënë rrugë të lirë shfaqjeve të dhunës në stadiume apo pallate sporti. Në një moment kur kjo ministri ka kërkuar heqjen e dispozitës së privatizimit të klubeve, apo shtyrjen e afatit të kthimit të tyre në shoqëri aksionere, ajo ka vendosur që të ngarkojë më shumë financuesit, duke u kërkuar atyre që të marrin përsipër edhe pagesën e një policie private. Propozimi i MTKRS-së është diskutuar dje në Komisionin e Ligjeve në Kuvend, ku ka pasur debate të shumta, sidomos nga deputetët e opozitës, të cilët e kanë quajtur absurde këtë ide. Gjithsesi, ky projektligj është kaluar për miratim nga Kuvendi, ku do të votohet gjatë javës së ardhshme.

Specialistët e MTKRS-së kanë vlerësuar se heqja e forcave të rendit nga ambientet sportive do të ishte në të mirë të sporti, pasi klubet do të impenjoheshin më shumë për të ruajtur sigurinë. Ata kanë bërë të ditur se qetësia në ambientet sportive mund të ruhej lehtësisht edhe nga kompanitë private të sigurisë. Deputetët e opozitës, të pranishëm në Komisionin e Ligjeve, Bashkim Fino dhe Arben Isaraj, kanë kundërshtuar menjëherë këtë ide të çuditshme, duke e quajtur të pamundur realizimin saj. "Praktikisht është e pamundur që të garantohet rendi në stadium nga policia private. Nuk ekziston në Shqipëri asnjë kompani private që ka kontingjentin e mjaftueshëm për të garantuar qetësinë në stadium gjatë një ndeshjeje futbolli të kombëtares, ku duhen mbi 200 policë për të ruajtur rendin. Në stadiumet tona nuk ka rrjeta për të penguar gjuajtjen me shishe në fushë, e jo më të pretendohet që një grusht policësh privatë të ruajnë një qytet të tërë", janë shprehur dy deputetët e PS-së. Këta të fundit kanë debatuar me ironi edhe me ideatorët e këtij projektligji. "Ju nuk e dini si është bërë topi i futbollit, e doni të bëni një ligj për sportin", ishte batuta e Isarajt. Ndërsa Fino ka ironizuar me deputetin e PD-së dhe anëtar të Komisionit të Ligjeve, Dashnor Sula, i cili mban njëkohësisht edhe rolin e presidentit të Shkumbinit. "Nuk ke faj ti që kërkon të largosh forcat e rendit nga stadiumet, sepse në këtë mënyrë e nxjerr lehtë Shkumbinin kampion", u shpreh Fino. Së bashku me Isarajn, ai ka garantuar se opozita ishte kundër këtij vendimi absurd që do të shkaktonte më shumë trazira se sa do të ndihmonte zhvillimin e sportit shqiptar.

Projektligji do të kalojë për miratim në Kuvend gjatë javës së ardhshme, ndërsa pritet që të ketë debate të shumta si nga opozita, ashtu edhe nga komuniteti sportiv. Në të gjitha rregulloret e aktiviteteve sportive në Shqipëri është e saktësuar se ato nuk mund të fillojnë pa praninë e forcave të rendit, që janë garant të sigurisë.

ky eshte nje gabim i madh duke pare temperamentin e shqiptareve ne pergjithsi
e gjithe bota ka policine ne stadium po ne jemi shume hapa para bote

Propozimi i MTKRS-së për të hequr forcat e rendit nga ambientet sportive komplikon në mënyrë të drejtpërdrejtë aktivitetet futbollistike në vend. Zëdhënësi i FSHF-së, Lysjen Nurishmi, ka shpjeguar se nuk është marrë mendimi i grupeve të interesit për këtë çështje, ndonëse ajo do të ndikojë negativisht te klubet që do të detyrohen të shtojnë shpenzimet, duke punësuar polici private. "Askush nuk na ka kërkuar mendim rreth këtij ndryshimi në "Ligjin për Sportin". Ne si FSHF nuk na ndikon drejtpërdrejt mungesa e forcave të rendit në stadiume, pasi në aktivitetet ndërkombëtare është e detyrueshme prania e policisë. Por ky vendim do të ndikojë negativisht te klubet e futbollit, të cilat do të jenë të detyruara të garantojnë sigurinë gjatë kampionatit. Me punësimin e policisë private do të shtojnë shpenzime të tjera të mëdha në buxhetin e tyre", shpjegoi zëdhënësi i FSHF-së.