FIFA shpall 30 emrat "magjikë"

FIFA ka publikuar dje listën e futbollistëve mes të cilëve do të zgjidhet edhe fituesi i trofeut prestigjioz "FIFA World Player". Një komision ekspertësh ka përzgjedhur 30 emrat të cilët do të votohen nga të gjithë trajnerët dhe kapitenët e kombëtareve, për të caktuar se kush do të jetë pasuesi i Fabio Kanavaros, fitues i edicionit të kaluar. Por kjo listë ka shkaktuar shumë polemika, kryesisht në Itali dhe Spanjë, pasi nuk janë përfshirë disa futbollistë të njohur, ndërsa mungojnë edhe shumë latino-amerikanë. Një tjetër çudi është edhe fakti se nga edicioni i kaluar janë 23 lojtarë "të konfirmuar", gjë që tregon se komisioni i ekspertëve ka menduar më shumë për emrat se sa për formën që kanë kaluar futbollistë të veçantë.

Italia është kombëtarja që ka më shumë përfaqësues, 5 të tillë, duke filluar nga portieri Bufon, mbrojtësit Nesta e Kanavaro, si dhe mesfushorët Pirlo e Gatuzo. Si skuadër është Barcelona që ka shtatë lojtarë në listë, Mesi, Ronaldinjo, Henri, Eto‘o dhe Deko janë më të njohurit, por nuk mungojnë edhe Turam dhe Markez, ndonëse nuk kanë shkëlqyer shumë gjatë vitit të fundit. Kjo ka bërë që të hapen shumë debate mbi saktësinë e listës, kryesisht në Itali dhe Spanjë. Italianët e kanë cilësuar absurde idenë e mospërfshirjes së Zlatan Ibrahimoviç, një prej kandidatëve edhe për "Topin e Artë", apo Françesko Totit dhe Luka Tonit. Suedezi i Interit është një prej sulmuesve më në formë të botës për momentin dhe e ka treguar këtë duke shënuar në vazhdimësi. "Është absurde të përjashtosh Zlatan Ibrahimoviç nga lista zyrtare e FIFA-s për 30 lojtarët më të mirë të vitit. Të mbash jashtë liste një talent të tillë do të thotë të dëmtosh futbollin", u shpreh drejtori i përgjithshëm i Interit, Ernesto Paolilo. Ndërkohë, drejtuesit e Federatës Italiane të Futbollit kanë reaguar për mospërfshirjen e Totit dhe Tonit, fitues të "Këpucës së Artë" evropiane në dy edicionet e fundit, liderë të skuadrave ku militojnë. Shtypi italian e ka cilësuar përzgjedhjen krejtësisht "politike", duke pasur parasysh se Kanavaro dhe Nesta nuk meritonin të ishin në këtë listë, pasi kishin kaluar një sezon aspak të mirë në nivelin personal, ashtu si Lilian Turam që ka "ngrohur" stolin e rezervave të Barcelonës gjatë vitit të fundit.

Edhe spanjollët janë irrituar me përzgjedhjen e bërë nga FIFA, pasi i vetmi futbollist iberik në listë është Fernando Torres, por pritej që të ishin të pranishëm edhe David Vija apo Çesk Fabregas, që kanë kaluar sezone të shkëlqyera me skuadrat e tyre.

Debatet vijnë edhe nga Amerika Latine, pasi në listë janë tre brazilianët Kaka, Ronaldinjo dhe Zhuninjo, por vetëm falë paraqitjeve me klubet ku aktivizohen. Ndërkohë, mungon kandidati brazilian nga ekipi që fitoi "Kupën e Amerikës", që mendohej të ishte Robinjo, i cili shkëlqeu në turneun veror. E çuditshme edhe zgjedhja e argjentinasve, pasi në listë figurojnë Mesi, Tevez dhe Rikelme, ndonëse këta dy të fundit nuk kanë shënuar arritje të mëdha me klubet respektive.


Kandidatët


Xhanluixhi Bufon (Itali)

Fabio Kanavaro (Itali)

Petr Çeh (Republika Çeke)

Deko (Portugali)

Didier Drogba (B. i Fildishtë)

Mikael Esien (Gana)

Samuel Eto‘o (Kamerun)

Xhenaro Gatuzo (Itali)

Steven Xherard (Angli)

Tierri Henri (Francë)

Zhuninjo (Brazil)

Kaka (Brazil)

Miroslav Klose (Gjermani)

Filip Lahm (Gjermani)

Frenk Lampard (Angli)

Rafael Markez (Meksikë)

Lionel Mesi (Argjentinë)

Alesandro Nesta (Itali)

Andrea Pirlo (Itali)

Frenk Riberi (Francë)

Huan Roman Rikelme (Argjentinë)

Ronaldinjo (Brazil)

Kristiano Ronaldo (Portugali)

Uejn Runei (Angli)

Xhon Terri (Angli)

Karlos Tevez (Argjentinë)

Lilien Turam (Francë)

Fernando Torres (Spanjë)

Rud Van Nistelroi (Holandë)

Patrik Vieira (Francë)