Ismaili: Shkumbini, çdo gjë me merite

Presidenti Xhavit Ismaili kërcënon me dorëhejqje nëse takimi i Kupës gjykohet nga i huaj
Nuk flitet në Peqin për humbjen e thellë 3 0 me Dinamon, por vetëm për Kupën, kur të mërkurën Shkumbini do të presë Flamurtarin në Peqin. Situata po tensionohet, kur nga ana e Flamurtarit kërkohet që ky takim të drejtohet nga një gjyqtar i huaj, por që ka ndeshur në kundërshtimin kategorik të drejtuesve peqinas, që e shohin si diçka të parregullt e të qëllimshme nga ana e kundërshtarit.
Presidenti Ismaili pranon që të dyja ndeshjet të drejtoheshin nga një gjyqtar i huaj dhe këtë kërkesë Flamurtari duhej ta kishte bërë me kohë te Shkumbini, duke i përballuar edhe shpenzimet bashkë të dy ekipet për të dy ndeshjet.
Keni kyrsyer forcat për ndeshjen e Kupës?
Kjo është e justifikueshme, pasi Kupa mbetet prioriteti ynë kryesor, me dëshirën për të shkuar për herë të parë në një finale. Mungesat e rëndësishme në formacion nuk ishin se po nënvlerësohej Dinamo, kundërshtarja e së shtunës, përkundrazi ishim të ndërgjegjshëm se po luanim me kampionen në fuqi, ku rezultati pozitiv ishte i vështirë për t’u arritur. Vepruam kështu për t’i pasur më të freskët disa nga lojtarët kryesorë.
Flamurtari e ka fituar takimin e parë 1 0. Besoni se Shkumbini do të arrijë ta përmbysë rezultatin?
Ne besojmë dhe mendoj se e kemi ekipin për t’u kualifikuar, por do të jetë fusha e lojës ajo që do të vendosë në fund. Unë kam besim te forca e ekipit dhe te puna e bërë, i cili me meritë i ka rezultatet në kampionat në vendin e katërt dhe në Kupë si gjysmëfinalist. Por nuk më vjen aspak mirë me situatën që po krijohet përpara ndeshjes, kur flitet se Flamurtari kërkon një gjyqtarë të huaj për takimin e Peqinit.
Ju nuk jeni në dijeni të kësaj kërkese?
Këtë fakt unë e kam marrë vesh nga media dhe kjo më shqetëson jo pak. Klubi dhe unë personalisht nuk kam dijeni, pasi nuk na është marrë asnjë mendim.
Ju nuk jeni dakord që takimi të drejtohet nga një gjyqtar i huaj?
Nuk jam kundër gjyqtarit të huaj, por nuk pranoj këtë për mënyrën se si po e kërkon Flamurtari ta paragjykojë ndeshjen e dytë. Kur Flamurtari paska dëshirë për ta drejtuar një gjyqtar i huaj, pse nuk e kërkoi që në ndeshjen e parë në vlerë dhe për të dy takimet dhe në marrëveshje mund të paguanin të dy klubet, si Shkumbini dhe Flamurtari.
Ardhja e një gjyqtari të huaj është pa kuptim se e vendos njëra palë, pa pyetur fare. Ne e pranuam humbjen, ndërsa tani Flamurtari pretendon për një gjyqtar të huaj dhe FSHF-ja mesa duket e miraton pa u thelluar në veprimet e veta.
Atëherë si do të veproni?
Ne jemi gati të pranojmë verdiktin e shortit apo të kompromisit për një nga gjyqtarët më të mirë të Shqipërisë. Për të tjerat, është fusha e lojës ajo që vendos, duke i ftuar të gjithë drejtuesit e FSHF së për të qenë të pranishëm në Peqin të mërkurën. Unë e kam ndarë mendjen që të mos pranoj në asnjë mënyrë gjyqtarë të huaj. Këtë vendim do t’ia transmetoj edhe klubit të Shkumbinit e bashkisë së qytetit. Nëse ata do ta pranojnë gjyqtarin e huaj, atëherë unë deklaroj publikiksht dorëheqjen time nga Shkumbini.
Gjyla: Nuk ka panik te Lushnja, do mbijetojë
Askush nuk mund ta mendonte nga tifozët lushnjarë, rreth 8000 të tillë në “Roza Haxhiu”, se Flamurtari do të merrte një pikë në Lushnjë, pasi të gjithë prisnin që loja të mbaronte, kur kishin mbetur edhe tri minuta. Verdhejeshilëve kjo u ka djeguar mjaft, pasi jo vetëm u humbën dy pikë, ndaj një kundërshtari direkt, por që këtë skuadër mund ta kishin kaluar në klasifikim dhe mund të ishin më komodë.
Lushnja vazhdon të jetë në fundin e tabelës, por java e 29-të rezervoi mjaft surpriza, të cilat në fund të tabelës kanë ngjeshur 6 skuadra në një diferencë prej 4 pikësh. Barazimi në Lushnjë, ndryshe përkthehet si humbje, por gara vazhdon dhe trajneri verdhejeshil ka akoma për të përmirësuar në skuadrën e tij.
f”Vërtet kemi lënë dy pikë shumë të rëndësishme, por përballja me Flamurtarin ishte një takim që i kishte të tri rezultatet brenda, pra i paparashikueshëm. E rëndësishme është se ekipi luajti, prodhoi lojë dhe krijoi raste për shënim.
E përsëris për të disatën herë, se na mungon finalizimi i aksioneve të krijuara dhe kjo është shqetësuese, pasi po nuk shënove, do ta pësosh. Kjo na ndodhi edhe ne. Kur ne po kërkonim të shënonim golin e qetësisë e të mbyllnim takimin, pësuam një gol pa pretendime dhe reagimi ishte i pamundur për të ndryshuar në aq pak kohë. Provuam, por nuk ia dolëm. Gjithsesi, kampionati ka ende javë për të zhvilluar deri në fund, unë për vete jam i bindur se do të mbijetojmë.
E bazoj këtë në faktin se e kam marrë ekipin me 13 pikë, në vendin e fundit në janar dhe tashmë jemi në zonën e “play out”-it. Ndoshta nga këto javë të mbetura dalim edhe më tej. Jemi shumë të qetë dhe nuk është aspak një gjendje alarmante në ekipin tonë,” - ka thënë Ilir Gjyla, trajneri i Lushnjës.

Ali Hallulli
Sporti shqiptar