Flamurtari fiton 1-0, kualifikimi vendoset në Peqin

E ka fituar ndeshjen e parë gjysmëfinale të Kupës së 57-të të Shqipërisë Flamurtari i Vlorës, me rezultatin e ngushtë 1-0 ndaj Shkumbinit, duke bërë një hap drejt finales, edhe pse “malorja” e vërtetë e pret në ndeshjen e kthimit, në Peqin. Që do të thotë se, realisht, kualifikimi për në finalen e kësaj veprimtarie, është i hapur. Ka qenë pikërisht minuta e 25-të, kur lojtari vlonjat, Halim Begaj, ka shënuar një gol të mrekullueshëm, i cili ka mbetur i vetëm për 90-minutat e këtij takimi. Kuqezinjtë e Flamurtarit kanë qenë më kërkues në këtë ndeshje, nisur edhe nga fakti se luanin në shtëpinë e tyre, ndërkohë që peqinasit kanë treguar kujdes të vecantë në prapavijë, për të pësuar sa më pak, në mënyrë që përmbysja në ndeshjen e kthimit të jetë një mision i mundur. Kësaj ia kanë arritur deri diku, sepse fitorja e ngushtë e Flamurtarit 1-0 nuk premton shumë për vlonjatët, kur dihet se në Peqin Shkumbini është një skuadër shumë e fortë dhe e suksesshme. Takimi i kthimit do të luhet pas dy javësh në Peqin, më 29 prill, me avantazhin e lehtë të vlonjatëve, të cilët ëndërrojnë ta fitojnë për herë të tretë Kupën e Shqipërisë, por pa dyshim që Shkumbini do të bëjë gjithçka për të arritur për herë të parë në një finale kupe
Sporti shqiptar