Shkumbini/Gjendet justifikimi për humbjen e dytë shtëpiake

Alibia e peqinasve: Fatin kundër!
Ndaj Partizanit, Shkumbini pësoi humbjen e dytë në shtëpi, në
sajë të një goli të ardhur në limitin e kohës shtesë. Për koiçidencë,
edhe disfata e parë e regjistruar në shtëpi përballë Lushnjës,
ishte pësuar në një terren të rënduar nga reshjet e shiut,
si të shtunën. Mesa duket skuadra peqinase e ka të vështirë të
fitojë në terrene të tilla, duke mos dalë në lojën e vet karakteristike,
ndonëse ndaj të kuqve dominoi prej minutës së parë. Në
të vërtetë, duke iu referuar lojës së zhvilluar, djemtë e Maganit
provuan me të gjitha mënyrat për të arritur te goli, por në disa
raste mbrojtja e Partizanit u tregua vigjilente dhe në të tjera
raste, të kuqtë i ndihmoi fati, pasi peqinasit goditën dy herë
shtyllën e portierit Shehi. Në mjaft episode, edhe terreni ndikoi
në mos funksionimin e aksioneve të rrjedhshme për vendësit,
pasi topi ngecte në baltë. Gjatë takimit është vërejtur gjithashtu
acarimi i teknikut të Partizanit, Shpëtim Duro ndaj gjyqtarit kryesor
Lulaj, duke ngritur duart drejt qiellit dhe duke thënë se vetëm
Zoti mund ta ndihmonte Partizanin. Ashtu ndodhi me të vërtetë,
pasi në minutat shtesë të akorduara nga gjyqtari i katërt erdhi
ndëshkimi i peqinasve, të cilët harruan prapavijën dhe Maho u
bëri “gjëmën”, duke shënuar në portën e kapiten Llanit. Tifozeria
vendëse e ka të qartë se lojtarët luftuan deri në fund për të
shënuar, prandaj kurrsesi nuk e paragjykuan skuadrën për humbjen
e së shtunës. “Thjesht ishim të pafat”, dëgjohet të thuhet
në kampin peqinas. Fundja, futbolli prandaj është i bukur, sepse
rezultati ngelet enigmë deri në momentet e fundit. Përkundër
kësaj humbjeje, që mund të quhet normale për një kampionat të
gjatë, Shkumbini ka mbetur në vendin e katërt, me 38 pikë.
Skuadra e Besës, që është edhe ndjekësja më e afërt me peqinasit,
ka fituar ndaj Teutës duke shkurtuar distancën me bardhekaltrit
në vetëm një pikë. E rëndësishme, për momentin, është
fakti që peqinasit janë në garë në të dy frontet, si në kampionat,
edhe në Kupën e Shqipërisë. F.Ahmeti
Paonramasport