Karçev e një sulmues u bënë tapë para derbit. E gdhijnë duke pirë alkool, ishin titullarë me Shkumbinin

Nikola Karçev kishte pirë aq shumë alkool një ditë
përpara ndeshjes ndaj Shkumbinit, sa që një nga
shokët e skuadrës e kishte marrë prej krahu për
ta shoqëruar me makinën e tij drejt apartamentit që maqedonasi
ka në lagjen “Dyli Haxhire” në qytetin e Elbasanit.
Gjithçka është konfirmuar nga burime të gazetës “Panorama
Sport”, që kanë konfirmuar se Nikola Karçev kishte
qenë nën shoqërinë e njërit prej sulmuesve kryesorë të
Elbasanit më datë 14 mars në një lokal në zonën e universitetit,
që është i preferuar nga shumë të rinj. Aty
maqedonasi, bashkë me sulmuesin ende misterioz, nuk
është kursyer, duke pirë pije alkoolike. Sipas informacioneve
të sakta, në tavolinën ku ka qenë Karçev ishte
e tejmbushur nga gotat e uiskit, që janë konsumuar
deri në orët e para të mëngjesit nga lojtari i Elbasanit
dhe një futbollist tjetër që ishte në fushë të dielën në
ndeshjen kundër Shkumbinit.
Lojtari i tretë
Në fakt, ka pasur informacione
edhe për një
lojtar të tretë verdheblu, i
cili më datë 14 mars ka
qenë gjithashtu tej mase i
pirë, por emri i tij nuk
bëhet publik, sepse do të
rrezikonte që skandali në
klubin elbasanas të merrte
përmasa edhe më të
mëdha. Ndërkohë trajneri
i ekipit të Elbasanit, Faruk
Sejdini, e mohoi në mënyrë
kategorike që djemtë e tij
të kenë konsumuar alkool
përpara ndeshjes. “Xhaxhi”
u shpreh se nuk ka informacion
në lidhje më këtë
hipotezë dhe se të gjithë së
bashku kishin konsumuar
përpara ndeshjes, siç do
natë, ushqimin në restorant,
më pas ishin akomoduar në
dhomat e konviktit.
Asnjë reagim
Ndërkohë që nga ana e
drejtuesve të klubit verdheblu
nuk ka pasur asnjë
reagim zyrtar në lidhje
me këtë çështje, ndonëse
një i tillë duhej, për vetë
faktin se është pikërisht
konsumimi i pijeve alkoolike, që ka sjellë edhe barazimin
kundër Shkumbinit. Normalisht ndaj lojtarëve
duhen të merren masa ekstreme, pasi ata janë tallur
me fanellën dhe paratë që marrin nga kontratat
shumëmilionëshe të nënshkruara me aksionerët e
ekipit të Elbasanit këtë sezon.
Vendimi
Në fakt, ky problem nuk do të kalojë kaq lehtë, pasi
drejtuesit e klubit verdheblu dhe konkretisht aksionerët
e Elbasanit, pritet që ditën e sotme të marrin një
vendim në lidhje me veprimet që do ndërmerren me
lojtarët, të cilët kanë qenë të dehur 24 përpara takimit.
Gjithsesi, ajo çka ka kaluar, tashmë nuk kthehet mbrapa,
por e rëndësishme është që ky veprim të mos
përsëritet.
Panorama sport