Peqinasit po shkruajnë historinë këtë sezon me gjysmëfinalen e kupës dhe vendin e 4-t në kampionat

Peqinasit po shkruajnë historinë këtë sezon me gjysmëfinalen e kupës dhe vendin e 4-t në kampionat
Nuk përbën ndonjë surprizë kualifikimi i Shkumbinit për në turin tjetër, i arritur në Kavajë të mërkurën për kupë, kur fitoi në fund të takimit 0 1 me autogolin e Ishkës. Ishte një kualifikim i pritshëm dhe përbën një nga objektivat e bardhekaltërve në këtë sezon.
Shkumbini sot është një realitet i pamohuar nga të gjithë në futbollin shqiptar, me një traditë dhe me një garanci financiare të lakmueshme. E veçanta kryesore e këtij ekipi në këtë sezon është se Shkumbini e kërkon rezultatin më shumë jashtë fushës së vet sesa në Peqin. Kështu po ndodh ne kampionat dhe në kupë.
Shkumbini e kërkoi kualifikimin për në gjysmëfinale më shumë se Besa vendëse dhe ndoshta në këtë rast ndikoi rezultati 1 1 i ndeshjes së parë në Peqin, që në pamje të parë favorizonte Besën për golin e shënuar në fushën kundërshtare.
Eshtë merita e gjithë futbollistëve dhe trajnerit Magani për mënyrën se si e përgatiti ndeshjen gjatë javës. Magani pati besim në kualifikim dhe diti të guxojë, duke e vendosur mirë ekipin në fushë, pa u mbyllur për asnjë çast në mbrojtje.
Nuk duhet harruar se ishin tri mungesa të rëndësishme, Nora e Dervishi të pezulluar dhe sulmuesi Rizvanolli i dëmtuar. Por Magani diti të mbështetej te futbollistët e stolit, duke besuar dhe duke ia arritur qëllimit. Aftësitë e Maganit u panë më mirë në pjesën e dytë, kur në fushë u duk një Shkumbin më sulmues dhe më i rrezikshëm, duke e bërë skuadrën e Besës ta kërkonte shpëtimin në vonesat e lojës.
“Kemi besuar në kualifikim dhe kemi arritur të fitojmë në Kavajë. Edhe pse me autogolin e Ishkës, mund të them se e kemi merituar plotësisht, ku duhet veçuar loja në pjesën e dytë ku Shkumbini ka qenë më kërkues.
Besa ishte me fat në Peqin që shënoi golin e barazimit, por edhe ne patëm fat që shënuam golin e fitores,” - shprehet Magani, i cili përmend edhe qëndrimin dinjitoz të sportdashësve kavajas e të futbollistëve në fushë, që ndryshe nga ndeshja e kampionatit, ishin tepër miqësor. Si ish futbollist i ekipit kavajas, ai gjen rastin të falënderojë dhe të shprehë respekt për tifozët dhe drejtuesit e Besës.
Për Maganin, eliminimi i Besës është një tregues i forcës së Shkumbinit, i cili ndoshta si asnjë sezon tjetër, ka ditur të luftojë me sukses në të dy kampet, kampionat dhe kupë. Ai kërkon që kualifikimi me Besën të jetë një nxitje më shumë për ndeshjen e radhës, ku Shkumbini do të udhëtojë drejt Elbasanit për t’u ndeshur me ekipin vendës. “Kemi filluar të mendojmë vetëm për ndeshjen me Elbasanin. Për vetë pozitat që kemi, në vendin e 4-t, në Elbasan kërkojmë rezultat pozitiv,” - ka përfunduar trajneri i Shkumbinit, Gugash Magani.
AliHallulli
Sporti shqiptar