Magani “toleron” gjyqtarin:

Pas barazimit të arritur të shtunën ndaj ekipit të Flamurtarit, peqinasit kanë ndërlikuar disi situatën për të qenë në ekipet pretendente. Kjo sepse tashmë diferenca me ekipin e Dinamos është katër pikë nga dy që ishte para këtij takimi. Nga ana e tij, trajneri Magani nuk e ka anashkaluar anullimin e golit nga anësori Elezi, por nuk ka dashur aspak që të gjithë fajin ta faturojë pikërisht atij. Ai është shprehur se një pjesë e fajit i takon edhe lojtarëve të tij, të cilët duhet të kishin bërë më shumë për të ruajtur rezultatin e pjesës së parë. “Nëse do të analizojmë takimin e fundjavës, mund të them se barazimi nuk ka qenë rezultati i drejtë, pasi gjatë tw gjithw takimit kemi qenë ne ata të cilët kemi kontrolluar lojën, ndërsa miqtë në një rast të pastër në zonën tonë kanë arritur ta shfrytëzojnë siç duhet, duke na ndëshkuar. Kjo ka ndodhur në një moment jo shumë të favorshëm, pasi edhe reshjet e shiut kanë qenë të tilla, që nuk të lejonin të zhvillonim aksione si në pjesën e parë, duke mos mundur të ndryshojmë ndonjë gjë. Ky takim ka patur disa gabime, të cilat kanë qenë evidente dhe që padyshim pres që të rregullohen në të ardhmen. Së pari – vazhdon Magani - një gabim mëse i qartë ka qenë vendimi i virojtësit, i cili mendoj se e ka parë që portieri vlonjat e ka pritur topin brenda vijës fatale, por nuk ka marrë mundimin të na akordojë një gol të qenë. Kjo padyshim i mbetet gjyqtarëve në dorë të bëjnë kujdes edhe ndaj ekipeve si Shkumbini, për të minimizuar sa më shumë penalitete të këtij lloji. Më tej, vëmendje duhej treguar në vijwn e parë të sulmit, ku lojtarët tanë kanë humbur raste të pastra pa fund. Së treti, më vjen keq pasi duhej të tregoheshim më të vëmendshëm në mbrojtjen e rezultatit që kishim arritur në pjesën e parë, duke parë që nuk po mund të shënonim golin e sigurisë. Tashmë këto që na ndodhën në këtë takim shpresoj që t’i rregullojmë në takimet e ardhshme”. Për sa i përket ndeshjes së mesjavës për kupën e shqipërisë, Magani shprehet: “Nuk e mendoj të mbyllur këtë takim. Një epërsi e vogël është në krahun e kavajasve, të cilët kanë shënuar gol në fushën kundërshtare. Në këtë takim do të udhëtojmë, duke mos e çuar nëpër mend këtë takim, por duke kërkuar që gjithçka të nisë nga e para. Pra sikurse ekipi kavajas mundi të na shënojë edhe ne nuk do të kërkojmë të mbrohemi, por do ta kërkojmë edhe golin. Më tej, gjithçka për kualifikimin do t’ia lwmë fushës së lojës. Djemtë tanë do të kenë impenjimin maksimal në këtë takim, për të bërë më të mirë”, ka përfunduar tekniku Magani.
Sport ekspres