SHKUMBINI 1-1 Flamurtari

Shkumbini s’përsërit javën e kaluar me Flamurtarin


Nga Peqini, Ali HALLULLI



Shkumbini ‑ Flamurtari 1‑1

Shënues: Mustafaj 12′, Veliu 86′



Shkumbini: Llani, Grami, Mujdragiç, Shameti, Pashja, Bizhyti (Gjata 83′), Shenaj, Turdiu, Delioski (Jaksimoviç 70′), Nora, Mustafaj. Trajner: G.Magani.

Flamurtari: Halili, Paniç, Begaj, Veliu, Beqiri (Liçaj 25′, Shehaj 55′), Guga (Strati 77′), Merxha, Çaushaj, Alvizh, Kuqi, Galica. Trajner: E.Memushi.

Gjyqtarë: K.Meta (Tiranë), E.Miho, F.Elezi (Durrës)

Kartonë të verdhë: Nora, Paniç, Alvizh



“Radiografia”

12′‑ Shkumbini kalon në avantazh. Nora nga e majta e sulmit kroson në zonë dhe përfiton Mustafaj, që kërcen me kokë dhe 1‑0 për Shkumbinin.

17′‑ Shameti ka mundësinë të dyfishojë rezultatin, por gjuajtja e tij me kokë në zonë përfundon ngjitur me shtyllën pingule .

21′‑ Delioski kërkon të përfitojë nga dalja e portierit Halili për të harkuar në portën boshën, por Halili reagon me vështirësi e largon rrezikun.

30′‑ Gjuajtja e Delioskit pritet nga portieri Halili në një pozicion të dyshimtë, pasi Shkumbini pretendon që është kaluar vija fundore, por gol nuk ka për asistentin Elezi.

47′‑ Topi i kthyer nga mbrojtja shfrytëzohet nga Çaushaj, por gjuajtja e tij është për t’u harruar.

52′‑ Nora shërben saktë për Mustafajin, që del i vetëm përballë Halilit, por gjuan keq në rrjetën e jashtme.

54′‑ Tenton Galica të rrezikojë me një gjuajtje nga larg, por pa gjetur kuadratin.

55′‑ Gjuajtja e Norës nga e majta e sulmit kalon gjithë zonën e portës, pa u shfrytëzuar nga sulmuesit e përfundon jashtë.

68′‑ Grami është treguar i saktë, duke i hequr topin nga këmba në momentin e fundit brazilianit Alvizh.

77′‑ Nora ka bërë më të vështirën pas topit të dhënë nga Shameti. Fare pranë dhe me portierin ai kërkon të bëjë gol të madh, gjuan mbi shtyllë.

86′‑ Veliu shfrytëzon goditjen e dënimit nga e majta e sulmit, duke gjuajtur saktë në shtyllën e dytë. Flamurtari barazon në 1‑1.

89′‑ Një gol i anuluar për Shkumbinin në çastet e fundit, pasi sipas gjyqtarit Meta, më parë është shkaktuar ndërhyrje e gabuar në dëm të portierit mik.

94′‑ Me gjithë presionin që krijon Shkumbini, ku nuk mungojnë edhe rastet, porta e Flamurtarit nuk preket më.





Komenti

Shkumbini, dje, përballë Flamurtarit, ka humbur dy pikë dhe mundësinë për t’u shkëputur më shumë nga ndjekësja më e afërt, Besa e Kavajës. Në takimin e djeshëm, i dyti brenda javës për këto 2 ekipe, Shkumbini, me gjithë dëshirën e madhe, nuk shkoi më shumë se barazimi 1‑1 me golat e shënuar nga një për secilën pjesë. Ka qenë një situatë krejt tjetër nga ajo e një jave më parë. Dje Shkumbini ka zhvilluar një pjesë të parë mjaft të mirë, atë që tregoi ditë më parë në pjesën e dytë, kur arriti të përmbysë rezultatin, por ka lëshuar shumë në pjesën e dytë, ndërkohë që te kundërshtari ka ndodhur e kundërta. Në këtë 45-minutësh vendësit kanë dominuar në të gjitha drejtimet, duke e gjetur shumë shpejt rrugën e rrjetës me golin e Mustafajit. Shkumbini krijon edhe raste të tjera përballë një Flamurtari pa forcë, që u kujdes më tepër për të prishur lojën e Shkumbinit, duke u mbrojtur, për të mos pësuar gola të tjerë. Porta e Shkumbinit nuk u rrezikua për asnjë moment dhe Llani ishte në rolin e spektatorit. Goli i parë të krijoi idenë se ai do të pasohej nga të tjerë, sepse edhe miqtë nga Vlora nuk ishin në gjendje te reagonin. Në minutën e 30‑të Delioski del i lirë brenda zonës dhe gjuan tokazi, duke e detyruar portierin ta presë topin, pasi ai e kishte kaluar vijën e portës, por nuk është i këtij mendimi asistenti Elezi, që bën shenjë që loja të vazhdojë. Në këto momente Flamurtari kërkon të përfitojë për të nisur një kundërsulm nga e djathta dhe është ndërhyrja e Gramit në rrethin e mesit të fushës që largon rrezikun.

Në pjesën e dytë që në fillim shohim një Flamurtar më të motivuar e më të organizuar, me synim për të gjetur golin e barazimit. Loja në mjaft raste shpërngulet në afërsi të zonës së Shkumbinit dhe vendësit të gjetur të papërgatitur, duke mos e pritur këtë reagim të vlonjatëve e kanë të vështirë ta marrin veten dhe kanë gabuar jo pak në marrjen e topit dhe në pasime. Është ekipi mik që korrigjon shumë nga loja e 45 minutave të pjesës së parë, duke qenë i saktë me kundërzbritjet. Në këto minuta të mira, kur Flamurtari ka epërsinë në lojë, Shkumbini i ka edhe rastet më të mira për të shënuar e për të mbyllur përpara kohe ndeshjen, pasi miqtë, nga dëshira për të gjetur golin e barazimit, krijuan shumë hapësira dhe Paniç e Begaj e patën të vështirë të ndalonin sulmuesit e Shkumbinit. Rastet e Mustafajit dhe të Norës e ndëshkuan jo pak ekipin më pas, sepse ata të vetëm përballë portierit bënë më të vështirën, duke gjuajtur jashtë. Flamurtari sikur merr zemër më shumë, duke e kontrolluar lojën, por pa arritur të rrezikojë portën e Llanit. Në të parën mundësi që iu dha, ata ditën të reagojnë dhe pas goditjes së dënimit nga distanca. Veliu diti të përfitojë për të shënuar golin e barazimit. Pas golit Shkumbini kërkoi të reagojë dhe kujtohet të sulmojë, por tani është vonë dhe miqtë arrijnë të përforcohen në mbrojtje, për të ruajtur rezultatin, duke qenë shumë të kënaqur me pikën e marrë.

Si përfundim, duhet të themi se ishte një takim korrekt nga të dy ekipet, përfundimi i së cilës i shpërbleu të dy skuadrat me atë që dhanë në fushë. Ishte një 90-minutësh ku Shkumbini e Flamurtari nuk u shfaqën plotësisht gjithë kohën, por vetëm për 45 minuta. Shkumbini në pjesën e parë dhe Flamurtari në të dytën. Për mënyrën se si u zhvillua loja, barazimi ishte rezultati më i drejtë, nga ku më i fituar doli Flamurtari me një pikë të marrë në Peqin.



Deklarojnë:

Gugash Magani, trajner i Shkumbinit: “Takimi me Flamurtarin ishte vlerësuar sërish, duke ditur që kësaj radhe do ta kishim më të vështirë. Kemi zhvilluar një pjesë të parë të mirë në të gjitha drejtimet, kemi arritur edhe avantazhin, madje edhe një gol tjetër të anuluar nga anësori. Në pjesën e dytë kemi lëshuar në lojë dhe Flamurtari na ndëshkoi në fund. Duhet ta kishim zgjidhur ndeshjen më shpejt. Po nuk shënove, e pëson, kjo na ndodhi neve në pjesën e dytë.”

Eqerem Memushi, trajner i Flamurtarit: Ashtu si javën e kaluar, nuk u paraqit në konferencën për shtyp.



Të veçanta:

‑ Edhe dje hyrja për tifozët ka qenë falas, me përjashtim të tribunës qendrore.

‑ Në pjesën e dytë nisi një shi i rrëmbyeshëm, por kjo nuk u bë pengesë për mbarëvajtjen e takimit.

‑ Për një moment pati një acarim të disa tifozëve vlonjatë me ata peqinas, por ndërhyrja e drejtuesve peqinas qetësoi gjithçka.

Sporti shqiptar

2300 TIFOZË
kanë qenë të pranishëm në fushën
sportive të Peqinit për të ndjekur
takimin Shkumbini-Flamurtari. Edhe
pse moti nuk ka qenë i favorshëm,
nuk i ka penguar aspak fansat që
të mbështesnin ekipet e tyre të
zemrës.
Goli i barazimit ka
entuziazmuar të gjithë
kampin vlonjat, por një
prej anëtarëve të stafit
të Flamurtarit, duket se e
ka kapur me tifozerinë
kundërshtare, duke i
ofenduar ata me
kryqëzimin e duarve. Por,
një gjest i tillë ka sjellë
menjëherë reagimin e
ashpër të tifozerisë
vendëse.
Policia ka arritur të
shuajë menjëherë
një zënkë të
ndodhur në tribunë.
Në fakt, përveç dy
tifozëve vlonjatë,
protagonist ka qenë
edhe ish-futbollisti
Ardit Behari.
Gjithsesi, pas
ndërhyrjes së
policisë, situata u
qetësua menjëherë.
Panorama sport