Mujdragiç, garancia e mbojtjes peqinase

Ka rezultuar një blerje mjaft e vlefshme për Shkumbinin ajo e e boshnjakut Ahmed Mujdragiç
Shkumbini i ka bërë një nisje mjaft të mirë vitit 2009, duke marrë
në 4 ndeshjet e zhvilluara 3 fitore (me Vllazninë, Partizanin dhe
Apoloninë) dhe duke pësuar vetëm një humbje me Tiranën në kryeqytet.
Këto rezultate sigurisht që nuk janë të rastit, por pasojë e punës që
është bërë që nga fillimi i sezonit dhe që e rendisin Shkumbinin në
vendin e 4 t në tabelë. Për periudhën e fundit, ekipi është konsoliduar
edhe më mirë, veçanërisht reparti i mbrojtjes me ardhjen e serbo
boshnjakut Ahmed Mujdragiç. Mbrojtësi 23 vjeçar është aktivizuar në të
gjitha ndeshjet, duke spikatur për vlerat që ka, duke qenë garanci për
ekipin në mbylljen në kohë të hapësirave për sulmuesit kundërshtarë. Me
Shkumbinin ka debutuar në mënyrë më të mirë në ndeshjen me Vllazninë më
31 janar, duke u cilësuar si lojtari më i mirë në fushë, për atë që
tregoi, pa harruar që ishte edhe autori i golit të vetëm që i dha
fitoren Shkumbinit në atë takim. Mujdragiçit i mjaftuan vetëm 20 ditë
stërvitje me Shkumbinin për t’u përshtatur aq mirë, duke të krijuar
idenë se ka një kohë të gjatë me Shkumbinin. 23 vjeçari është një
mysliman i devotshëm, që i bën të gjitha ritet e fesë së tij, pa e
penguar aspak punën përgatitore që bën në stërvitje bashkë me ekipin.
Shtatlarti serbo boshnjak luan në qendër të mbrojtjes bardhekaltër,
duke qenë për çdo rast tepër i saktë në ndërhyrjet e tij, pa harruar të
organizojë si duhet mbrojtësit e tjerë. Mujdragiç mund të cilësohet pa
frikë si një nga futbollistët e huaj nga më të mirët që luajnë në
kampionatin shqiptar. Ai di të përdorë mjaft mirë të dy këmbët në
fushën e lojës, pa harruar edhe aftësinë e luftës në ajër, duke qenë
vazhdimisht superior në goditjet me kokë përballë kundërshtarit. “Nuk e
pata menduar kurrë më parë që do të gjeja një mjedis kaq të ngrohtë e
dashamirës. Kjo më ka bërë përshtypje dhe unë ndihem mjaft mirë te
Shkumbini, ndihem i kënaqur dhe i respektuar nga të gjithë dhe kjo më
nxit t’ua shpërblej në fushën e lojës. Jam përpjekur të bëj më të
mirën, por jam i bindur se kam ende për të dhënë për Shkumbinin,” -
shpreh kënaqësinë e tij plot çiltërsi mbrojtësi Mujdragiç. Edhe
përballë Apolonisë në ndeshjen e fundit në Fier, Mujdragiç rezultoi një
nga pikat më të forta të Shkumbinit, duke qenë përcaktues në fitoren e
arritur, për më tepër që mposhti ish-trajnerin e tij Karishik.
Optimizmin ai e shpreh edhe për ndeshjen e radhës me Flamurtarin në
Peqin, duke shpresuar se ekipi do të bëjë në fushë ato që janë parë në
takimet e tjera, përfshi edhe ndeshjen e kupës me Besën, qetësinë dhe
shpirtin e garës. “Nuk e njoh kundërshtarin e radhës, Flamurtarin, por
jam informuar për grupin që ata kanë me futbollistët e rinj e të
talentuar e me një traditë të madhe në futbollin shqiptar. Mua kaq më
mjaftojnë, sepse kjo do të shihet më mirë të dielën. Jam i bindur se i
kemi të gjitha mundësitë për ta kaluar me sukses, duke arritur ta
vlerësojmë jo nga pozicioni, por nga tradita që paska Flamurtari në
futbollin shqiptar,” - përfundon mbrojtësi serbo boshnjak i Shkumbinit,
Ahmed Mujdragiç.