Krenaria e Ismailit: Sukses, edhe pa mua në tribunë

Pas fitores së ditës së dielë në kampionat, ku Shkumbini
fitoi 1-0 ndaj Partizanit, të gjithë futbollistëve iu akordua
një ditë pushim në mënyrë që të jenë sa më të freskët për
impenjimin e radhës. Edhe stafi i klubit ka mbetur i kënaqur
nga paraqitja e lojtarëve dhe sidomos nga shpirti i lartë i
treguar në fushë, duke arritur një fitore të vështirë përballë
një kundërshtari që luftoi deri në fund për të arritur te barazimi.
E vetmja "mangësi" në këtë sfidë delikate ishte mosprania
e presidentit të skuadrës Xhavit Ismaili. Por pasi
është kthyer nga Italia, ai ka mbetur mjaft i kënaqur, kur
është informuar për suksesin e skuadrës, në të cilën investon.
Dje, në një mbledhje të shkurtër në ambientet e
stadiumit, vetë njëshi i klubit peqinas ka përgëzuar të
gjithë futbollistët, duke u shprehur mjaft entuziast për
arritjen e fitores nga bardhekaltërit. "Prania ime në stadium
ka qenë gjithmonë fatsjellëse për skuadrën, por edhe
kësaj here që nuk munda të isha prezent më duhet të
falenderoj të gjithë futbollistët, të cilët kanë luajtur me
zemër ndaj Partizanit, sidomos në pjesën e dytë, kur ekipi
mbeti me 10 futbollistë", është shprehur presidenti i
skuadrës, përsa i takon fitores së të dielës në kampionat,
atëherë kur ai kishte udhëtuar në Milano për të ndjekur
derbin Inter-Milan. Më tej, Ismaili ka shtuar se gjithashtu
prania e tij ka për qëllim që të motivojë lojtarët për të vazhduar
rrugën e tyre në realizimin e objektivave, pasi mbështetja
financiare do të jetë konstante dhe në raport me arritjet
e skuadrës. Në këtë drejtim duhet theksuar se njëshi i
klubit bardhekaltër ka qenë gjithmonë korrekt, si në lidhje
me pagesat e futbolistëve sipas kësteve, ashtu edhe në
dhënien e premiove në rastet kur janë premtuar ato. Në
skuadrën peqinase vazhdon të funksionojë e njëjta formulë,
sipas së cilës futbollistët shpërblehen me premio
në rast se arrijnë të marrin 7 pikë në 4 ndeshje (dy fitore
dhe një barazim). Nëse arrihen më shumë pikë, jo vetëm
që premio është e siguruar, por ato mblidhen për javët në
vazhdim, sipas të njëjtës formulë. Rikthimi dhe fjalët e
presidentit kanë ngrohur të gjithë futbollistët, të cilët i
kanë premtuar atij vazhdimësinë e rezultateve pozitive.
Pas javës së 20-të, skuadra e Shkumbinit e gjen veten në
kuotën e 30 pikëve, duke u pozicionuar në vendin e katërt,
një pikë më shumë sesa Besa e vendit të pestë. Të gjithë në
Peqin i gëzohen suksesit të skuadrës së tyre dhe janë të
vetëdijshëm se tani duhet të luftohet fort, për të ruajtur
këtë pozicion komod. Fatmir Ahmeti
Panorama sport