Dervishi, dy gëzime në ditën e 27-vjetorit

Shkumbini ka vazhduar ecurinë e rezultateve pozitive,
pasi ka arritur të fitojë ndaj një kundërshtari si
Partizani, që në Peqin zhvilloi një futboll të bukur, duke
luftuar deri në fund për të marrë qoftë një pikë. Fatin e
sfidës e ka vendosur një gol i bukur i sulmuesit të talentuar
peqinas Roland Dervishi, i cili ka festuar në
mënyrën më të mirë 27-vjetorin, duke i dhuruar
skuadrës një trepikësh mjaft të vyer. Në fund të takimit,
sulmuesi është parë mjaft entuziast, nisur edhe nga
paraqitja e mirë e skuadrës, në të cilën është rritur dhe
formuar si futbollist.
Korrektësia
Bardhekaltrit kanë arritur dy fitore në tre takime që
pas rinisjes së kampionatit më 31 janar, duke mposhtur
me rezultate të njëjta Vllazninë dhe Partizanin.
Ndërsa, humbjen e ka pësuar ndaj Tiranës, ekip me të
cilin nuk është turp që të humbasësh nisur nga forma e
shfaqur prej bardhebluve. Fitorja ndaj Partizanit ka
ngrohur edhe stafin teknik, teksa vetë trajneri Magani
në fund të takimit ka pohuar se ishte arritur një fitore e
vështirë, por e merituar. Kundërshtari i peqinasve gjatë
të dielës, në fakt hyri në ritmin e lojës vetëm në pjesën e
dytë, duke kërkuar me ngulm barazimin, por u ndesh
përballë një muri të ngritur nga lojtarët bardhekaltër,
që nuk lejuan të cenohej rrjeta e tyre. Teksa të dyja ekipet
zhvilluan një lojë korrekte në fushë, e njëjta gjë mund
të thuhet edhe për tifozeritë respektive, që i kanë mbështetur
skuadrat fuqishëm në mënyrë të kulturuar, duke
pranuar rezultatin. I vetmi tifoz i përhershëm i peqinasve
që mungoi në këtë takim ishte presidenti Ismaili,
i cili kishte udhëtuar drejt Italisë për të ndjekur derbin
e Milanos midis Interit dhe Milanit.
Aludimi
Fitorja e së dielës ndaj Partizanit pati vlera të dyfishta
për Shkumbinin, sepse jo vetëm që e ngjiti në vendin e
katërt, por njëkohësiht i hodhi poshtë të gjithë ato
paragjykime të sëmura të individëve të veçantë, të cilët
gjatë javës patën aluduar për një tolerim ndaj të kuqve.
Sipas disa “gojëve të liga”, skuadra vendëse mund të
bënte ndonjë lëshim ndaj Partizanit. Por këto mendime
nuk patën asnjë ndikim në skuadër, gjë u pa qartë në atë
që u shpreh në fushë, ku jo vetëm që nuk toleroi, por dha
shpirtin për të arritur suksesin e merituar, që ishte i shtati
në shtëpi, ku gjithashtu ka arritur dy barazime dhe
një humbje të vetme, atë ndaj Lushnjës.
Panorama-sport