Shkumbini e pranon:Ndaj të kuqve,ishte e vështirë

17 Shkurt Ka qenë minuta e 12?të kur mbrojtësi peqinas është përplasur me një mesfushor të Partizanit dhe ka pësuar një dëmtim jo të vogël. Megjithatë ka marrë ndihmën e parë, duke u fashuar dhe vazhduar lojën normalisht, në pjesën e dytë i ka nisur një hemoragji e dytë, çka e ka detyruar teknikun të bindë lojëtarin të lërë fushën e lojës dhe të zëvendësohet. Tashmë lojtari ka bërë dy qepje dhe duket se e çara do t’i kalojë për një afat tre katër ditor. Për lojtarin, e rëndësishme ka qenë fitorja ndaj Partizanit, ndonëse e pranon që ka ardhur me shumë mund dhe sakrificë. “Padyshim që java para kësaj ndeshje ka qenë shumë e tensionuar dhe një ferr i vërtetë për ne. Kjo për arsye se kur kemi të bëjmë me ndeshje të tilla në një qytet të vogël ka fjalë nga më të ndryshmet. Të gjitha këto padyshim që ndikonin negativisht në psikologjinë tonë. Mirëpo ne treguam se jemi larg çdo kompromisi, larg çdo falsiteti dhe të denjë të luftojmë për një vend nderi në këtë kampionat. Nuk mund të them se fituam lehtësisht, pasi ekipi kundërshtar kishte ardhur me një ide, të merrte çtë mundte në peqin. Në pjesën e parë ata luajtën thuajse të gjithë në mbrojtje, duke u ruajtur një goli të shpejtë. Goli i Dërvishit ishte një konkluzion i rasteve të panumërta që ne kishim para portës kundërshtare. Në pjesën e dytë – vazhdon Grami ? ne luajtëm me inferioritet numerik, por shpirti i garës dhe impenjimi maksimal për takimin bënë që të ruajmë deri në fund këtë fitore. Tashmë shohim edhe më afër ekipet si Dinamo, por pse jo dhe diku më lart. Aktualisht duhet menduar për takimin e radhës, ku Apolonia ka treguar një formë të mirë dhe padyshim që nuk duhet nënvlerësuar, por në të kundërt duhet parë me syrin real. Ne do të bëjmë ç’mos që të arrijmë edhe në këtë transfertë një rezultat pozitiv, ndonëse asgjë nuk është e lehtë”, përfundon mbrojtësi tiranas i Shkumbinit, Elton Grami.
Sport ekspres