Magani: Shkumbini është brenda objektivave

Trajneri Gugash Magani nuk e dramatizon humbjen e fundit me Tiranën në transfertë

Shkumbini, që luajti një ditë më vonë, nuk ka ditur të përfitojë nga gabimet e rivalëve të drejtpërdrejtë, Dinamos dhe Besës, që humbën të shtunën me Partizanin dhe Vllazninë, për t’u ngjitur në vendin e tretë në renditje. Përballë Tiranës të drejtuar nga Kola, ekipi i Shkumbinit duhet pranuar që nuk ishte në nivelin e një jave më parë, kur mposhti Vllazninë në Peqin me lojë dhe rezultat.

Edhe pse është për t’u vlerësuar paraqitja dinjitoze e Shkumbinit, duhet pranuar se në përgjithësi ekipit i mungoi mentaliteti i duhur i fituesit në fushën kundërshtare, për më tepër ndaj një ekipi si Tirana, me të cilin Shkumbini ka bilancin më negativ krahasuar me ekipet e tjerë. Pritej që ekipi i Maganit të ishte më kërkues dhe të mos mjaftohej vetëm me ato minuta të mira të pjesës së parë, kur arriti të krijonte 2 raste të pastra, pa ditur t’i shfrytëzojë si duhet. “Tirana e meritoi fitoren, sepse ekipi i Shkumbinit në këtë takim nuk arriti të shfaqej në nivelin e duhur, ndryshe nga ajo që tregoi ditë më parë, në ndeshjen me Vllazninë në Peqin.

Duhet pranuar që disa lojtarë të veçantë akoma nuk e kanë mentalitetin e duhur të fituesit kur luajnë në fushat kundërshtare dhe me skuadrat më të mira. Ishte një ndeshje ku nuk arritëm të dalim në lojën tonë,” deklaron trajneri Magani, duke analizuar humbjen e pësuar të dielën me Tiranën në kryeqytet.

Duke kërkuar të nxjerrë mësimet e duhura nga kjo humbje, trajnerin Maganin e shqetëson edhe fakti që ekipi i tij ndëshkohet për pakujdesi në vendosjen në goditjet standarde. Eshtë një fakt i njohur për ekipin e tij në ndeshje të mëparshme, prandaj dhe pati punuar gjatë javës në këtë drejtim, por pa e gjetur dot “ilaçin”.

Dhe kjo i kushtoi dy gola. “Në pjesën e parë patëm dy raste të mira që nuk ditëm t’i shfrytëzojmë, ndërsa Tirana u tregua më e saktë në lojën e vet, duke na ndëshkuar nga goditjet standarde. Eshtë për t’u theksuar kjo, sepse pikërisht për këto raste i kishim këshilluar futbollistët që të tregoheshin të kujdesshëm,” shton më tej Magani, pa mohuar vlerat e kundërshtarit, si dhe të disa futbollistëve të veçantë të Tiranës.

Magani, nga ana tjetër, kërkon të ruajë qetësinë, sepse për të është vetëm një ndeshje e humbur, për më tepër ndaj një skuadre si Tirana, pretendente për titullin e kampion, krahas Vllaznisë. Ai kërkon që humbja të analizohet si duhet për të reflektuar në ndeshjen e radhës. Vetë pozicioni në të cilin ndodhet Shkumbini, në vendin e pestë, kërkon që reflektimi të jetë i menjëhershëm për të kënaqur sportdashësit e vet. Magani ngulmon që të vlerësohet kundërshtari i radhës, çka do të tregohet në stërvitje. Çdo nënvlerësim i Partizanit do të ishte me pasoja për ekipin e tij. Ai kujton që kundërshtari i radhës vjen me një moral të lartë pas tri fitoresh radhazi. Ishte fitorja e fundit me Dinamon, që e detyroi trajnerin kroat Daliç të japë dorëheqjen, për të treguar se Partizani duhet vlerësuar jo për pozicionin në tabelë, por për traditën që ka. Ai ka pasur mundësi ta ndjekë nga afër kundërshtarin e radhës. Një fitore me Partizanin do ta mbante skuadrën e tij mes më të mirëve. “Duhet të kemi shumë kujdes në ndeshjen me Partizanin.

E kam ndjekur nga afër derbin me Dinamon, ku Partizani ka fituar me meritë të plotë. Duhet ta lëmë pas ndeshjen me Tiranën, sepse nuk erdhi fundi që humbëm me një kundërshtar të tillë. Jemi brenda objektivave tona, që nuk kanë ndryshuar. T’i shfrytëzojmë këto ditë që të stërvitemi më mirë e të reflektojmë në fushën e lojës,” përfundon trajneri i Shkumbinit, Gugash Magani.
Ali HALLULLI
Sporti shqiptar