Maqedonasi Deliovski: Peqini, shtëpia ime e dytë

Zvete Deliovski është futbollisti i parë i huaj, të cilin Shkumbini
e kishte marrë në skuadër që me fillimin e sezonit futbollistik
2008-2009, kur erdhi nga Apolonia e Fierit me të cilën kishte
kaluar dy sezone. Vetë trajneri i peqinasve Gugash Magani
kërkoi me ngulm që maqedonasi Deliovski të aktivizohej në
repartin e mesfushës të skuadrës që drejtonte dhe ardhja e tij
u bë me konsensusin e klubit fierak. Në sfidat e para të këtij
kampionati, Deliovski është aktivizuar në të gjithë takimet, duke
treguar një formë të mirë sportive me shpejtësinë e tij në organizimin
e aksioneve sulmuese, madje duke shënuar edhe një
gol në sfidën e parë ndaj Bylisit. Në fund të muajit nëntor,
maqedonasi do të dëmtohej në gjurin e djathtë, gjë që e mbajti
jashtë fushave për gati pesë javë. Ndërprerja për pushimet e
dimrit i shërbeu më së miri Deliovskit për të rifituar formën e
humbur dhe besimin e trajnerit Magani, në mënyrë që ta aktivizonte
përsëri në skuadër. Në një prononcim të shkurtër për
“Panorama Sport”, vetë Deliovski shprehet se ndjehet shumë
mirë në Peqin dhe tashmë është ambientuar plotësisht në këtë
qytet. Duke qenë se mesfushori maqedonas ka dy vjet që
qëndron në Shqiperi, ai ka mësuar të flasë shqip dhe tashmë
me të mund të komunikohet lirshëm. Ndër të tjera, Deliovski flet
për aventurën në skuadrën peqinase, që ka nisur plot para
pesë muajsh, duke theksuar se në Peqin ka gjetur një ambient
futbolldashës dhe mikpritës. “Njerëzit në rrugë më përshëndesin,
pasi e dinë që unë flas shqip. Për këtë ndihem i lumtur, por
edhe i respektuar”, shprehet Deliovski. Ndërsa përsa i përket
pyetjes nëse është i kënaqur nga paraqitjet e tij dhe nga ecuria
e deritanishme e Shkumbinit, maqedonasi shton: “Më vjen
keq që dëmtimi më mbajti larg fushave për një kohë të gjatë,
pa arritur të kontribuoj për skuadrën në ato javë”. Ndërsa,
në lidhje me ecurinë e peqinasve, Deliovski shprehet se
skuadra e Shkumbinit meritonte të ishte më lart në renditje,
pasi mundësitë i ka pasur për të marrë më shumë në disa
sfida. Maqedonasi ka edhe një detyrë tjetër në skuadër,
pasi me ardhjen e dy futbollistëve të rinj në janar, konkretisht
të serbit Igor Joksimovic dhe të boshnjakut Ahmed
Mojdragiç, ai shërben edhe si përkthyes i tyre për stafin
peqinas. Madje jo vetëm kaq, por Deliovski u mëson atyre
edhe ndonjë fjalë shqip, sidomos ato që nevojiten gjatë
stërvitjeve dhe gjatë zhvillimit të ndeshjeve. Në lidhje me
takimin e ardhshëm që peqinasit do ta luajnë përballë Partizanit,
mesfushori maqedonas shprehet se ky ekip po kalon
një periudhë të mirë dhe kërkon vëmendjen e duhur nga të
gjithë. “Tashmë çdo ekip i Superiores po luan fort dhe të
gjithë po kërkojnë të marrin pikë në çdo qytet ku luajnë. Prandaj
edhe Partizani duhet vlerësuar drejtë, në mënyrë që të
dalim vetëm me tre pikë nga kjo sfidë”, përfundon prononcimin
e tij maqedonasi Deliovski. Fatmir Ahmeti
Panorama sport