LLani: Për Partizanin nuk ka “dhurata”

9 Shkurt Fillimi i fazës së dytë i ka përballuar peqinasit me takime tepër të vështira dhe me ekipe të mëdha. Pasi ka kaluar me sukses ekipin shkodran në shtëpi, peqinasit kanë ndaluar në transfertën e kryeqytetit, ku janë mundur nga Tirana. Në javën pasardhëse peqinasit sërisht do të kenë një përballje të madhe, ku ekipi i Partizanit do të kërkojë të hakmerret për humbjen që peqinasit i shkaktuan në fazën e parë. Duket sikur Partizani po e kalon situatën e krizës dhe po kërkon kthesën, që e largon atë nga zona e rënies nga kategoria. Kjo i mobilizon edhe më shumë peqinasit të tregojnë kujdes dhe një interesim, sikurse në takimin ndaj Vllaznisë, për të kaluar provën e radhës. Kapiteni Llani është i mendimit se peqinasit do të tregojnë profesionalizëm, për të mos i bërë ndonjë “dhuratë” të mundshme të kuqve. “Padyshim që në këto dy takimet e para kemi patur përballje vërtet të vështira. Jam i bindur se ekipi i Tiranës bën diferencën në kampionatin shqiptar, ndaj edhe humbja ndaj tyre është deri diku i justifikuar. Padyshim që për ne çdo takim shënon përballjen e radhës, ndaj dhe për ne vlerësohet çdo takim. Nuk mendoj se ekipet kanë ndonjë dallim të madh midis tyre, duke parë ecurinë e takimeve në çdo javë. Ndaj për ne ka rëndësi të vlerësojmë drejt secilën përballje. Nuk dua të bëj ndonjë analizë të gjatë për atë çka lamë pas, sepse tashmë vëmendja është përqëndruar te takimi i fundjavës së ardhëshme. Partizani është ekipi i vetëm që i kemi marrë tre pikë në fushën e vet, ndërsa sot them se nuk kemi përballë skuadrën e fazës së parë. Në këtë pjesë të dytë të kampionatit, ekipi i kuq ka hyrë siç duket me tjetër mentalitet dhe kam përshtypjen se e ka harruar krizën financiare dhe po mendojnë të shpëtojë nga rënia një kategori më poshtë. Po ashtu të kuqtë s’kanë ç’të humbin, ndaj dhe kjo i lejon ata të jenë jashtë çdo trysnie. Pikërisht kjo është ajo të cilën ne duhet ta shmangim. Në këtë takim – vazhdon komentin e tij Llani ? duhet të jemi të qetë, të mobilizohemi maksimalisht, sikurse edhe në takimin me Vllazninë. Së fundi mund të them me bindje, se nuk kemi hequr aspak dorë nga objektivat tona për të arritur më të mirën në këtë sezon. Deri sa ne jemi ende pjesmarrës në kupën e Shqipërisë tregon qartë se lufta jonë sportive mbetet ende gjallë, për të arritur një pozicionim sa më të mirë. Ne jemi koshient se besimin dhe ndihmën e madhe të dhënë nga presidenca jonë, duhet ta shpërblejmë në fushën e lojës”, ka përfunduar portieri i Shkumbinit.
Sport ekspres