Branica: Humbëm, se ishim të pakujdesshëm

Në harkun e pesë ditëve peqinasit kanë marrë një fitore dhe kanë shënuar edhe humbjen e parë për 2009. Një javë më parë, peqinasit thyen ekipin shkodran dhe skuadra udhëtoi tepër e mobilizuar dhe me moral të lartë drejt kryeqytetit. Por duket se edhe këtë rradhë, peqinasit nuk kanë mundur të thyejnë traditën, teksa kanë qenë të pafuqishëm ndaj ekipit të Tiranës, i cili në dy raste që iu dhanë i shfrytëzoi ato më së miri, duke shkaktuar një tjetër humbje. Për teknikun Branica humbja ka ardhur si rezultat i dy pakujdesive, por edhe i mungesës së mentalitetit fitues. “Në të vërtetë ishim nisur në drejtim të kryeqytetit për një rezultat pozitiv por që nuk e arritëm dot. Së pari, të dy ekipet nuk kishin ndonjë rast dhe mundësi më të artë sesa rastet e golave. Më tej edhe golat kanë qenë si rezultat i pakujdesisë nga ana e lojtarëve tanë dhe mund të neutralizoheshin. Ndoshta ende nuk është ngulitur tek ne mentaliteti i fituesit në çdo takim ndaj dhe kemi punë për të bërë në këtë drejtim. Për ne, çdo gjë mbetet e hapur dhe do të punojmë në të ardhmen për të arritur objektivat tona për këtë kampionat. Megjithatë, takimi ndaj Tiranës kishte vështirësinë e vet, ndaj dhe na duhet të rikthehemi punës për takimin e ardhshëm ndaj Partizanit. Mendoj se nuk ka vend për një hap të gabuar, kur flasim edhe për takime në fushën tonë, ndaj do t’i përkushtohemi punës për takimin e radhës. Sport ekspres