Boshnjaku Mojdragiç: Goli, për tifozët

Nuk kishte se si të niste më
mirë aventura e futbollistit
boshnjak, Ahmet Mojdragiç,
me fanellën e Shkumbinit,
teksa ka shënuar në të 20’,
golin e fitores në portën
shkodrane. Përtej këtij goli,
Mojdragiç është përshtatur
shumë mirë me skuadrën,
njësoj sikur të kishte
vite që luante me fanellën
peqinase. Një gol me të
vërtetë i rëndësishëm, i cili
rezultoi deciziv për bardhekaltrit
e Maganit. Vetë
trajneri peqinas, Gugash
Magani, ka dhënë pëlqimin
për këtë lojtar, të cilin e
kishte vëzhguar gjatë periudhës
përgatitore të zhvilluar
në Ulqin. Në prag të
sfidës me kryesuesen e
kampionatit, Vllazninë, Magani
vendosi t’i jepte rolin e
titullarit Mojdragiçit, teksa
kishte parë dhe aftësitë e
mira si mbrojtës të boshnjakut
22-vjeçar. Vendimi i
teknikut rezultoi mjaft i saktë,
pasi Mojdragiç u bë i pakalueshëm
nga sulmuesit
shkodranë. Në disa raste
të vështira, brenda zonës
peqinase, largonte topat e
lartë e në çdo rast fitonte
duartrokitjet e tifozerisë. Në
fund të përballjes me Vllazninë,
Mojdragiç ka marrë
falënderimin e të gjithë
shokëve të skuadrës, si
dhe të drejtuesve peqinas.
Në dhomat e zhveshjes së
bardhekaltërve, mjaft i
kënaqur është parë edhe
presidenti i klubit, Xhavit
Ismaili, së bashku me deputetin
dhe zëvendëspresidentin
Dashnor Sula. Ata
e kanë përqafuar boshnjakun
dhe i kanë kërkuar
një gol edhe në sfidën me
Tiranën. Ahmed Mojdragiç
u shpreh se është mjaft i
kënaqur me golin e shënuar
dhe i falënderon të gjithë
për mbështetjen e zjarrtë.
Më pas shtoi se për fitoren
me Vllazninë, merita nuk
ishte vetëm e tija, por e të
gjithë skuadrës. E para se
ta mbyllte, golin ia ka dedikuar
tifozerisë së zjarrtë
peqinase. Mbrojtësi boshnjak,
i ardhur në këtë merkato
dimri, përveçse një
futbollist i përgatitur, është
edhe një besimtar i madh e
madje praktikant rregullt i
fesë myslimane. Ai kryen
çdo ditë ritet fetare në
xhaminë e qytetit të Peqinit.
Fatmir Ahmeti
Panorama sport