Vllaznia, edhe kundër bilanceve në Peqin

Shkodranët ndaj Shkumbinit, sidomos në transfertë, kanë pasur gjithmonë vështirësi
Përveç skuadrës peqinase në fushë, Vllaznia të shtunën që vjen do
ketë kundër edhe bilancet e ndeshjeve të zhvilluar në Peqin. Themi
kështu, duke iu referuar 18 ndeshjeve që këto dy skuadra kanë zhvilluar
në këtë qytet që prej 11 marsit të vitit 1995, kur janë takuar për herë
të parë. Atëherë, ndonëse Shkumbini ishte debutues në kategorinë më të
lartë të futbollit shqiptar, arriti t’i mposhtë shkodranët me
rezultatin 1 0.
Kjo situatë vazhdoi edhe për disa kohë të tjera, teksa vendësit
deri në shkurt të vitit 2002 do të fitonin radhazi plot 8 ndeshje.
Vllaznia asnjë, madje as barazim. Nuk e bëri këtë as në vitin 1998 apo
2001, kur do dilte kampione. Në Peqin për ta fitorja ishte një tabu. Me
kalimin e viteve, ngjarjet do fillonin të rrokulliseshin.
Nga dhjetori i vitit 2002 dhe deri në nëntor 2005 bilancet mes
këtyre dy skuadrave do flisnin vetëm “shkodrançe”. Ata kanë arritur 5
fitore radhazi dhe 1 barazim, duke mos humbur në këtë fushë për 3 vjet
më radhë. Me këto rezultate u duk se gjërat do fillonin të
rregulloheshin në bilancin e përgjithshëm, por do të jetë sërish
Shkumbini ai që nuk do të pranonte disfatën në fushën e tij.
Për këtë arsye, Vllaznia bën gati katër vjet që nuk njeh fitoren në
fushën e vështirë të Peqinit. Natyrisht, shumë për një skuadër, që
gjithnjë është konsideruar pretendente. Por sfida të tilla kanë qenë
gjithnjë të vështira për kuqeblutë. Ata madje kanë humbur edhe 4 0 në
atë fushë, ku do luajnë edhe këtë të shtunë.
Megjithatë, bilancet nuk janë gjithçka në një ndeshje futbolli. Ato
nuk vendosin në fatin e një ndeshjeje dhe këtë drejtuesit e Vllaznisë e
kanë të qartë. Madje trajneri i saj, Agim Canaj, nuk e di fare se
skuadra që ai drejton sot ka këtë bilanc negativ në fushën e
Shkumbinit. Ai po mundohet ta përgatisë siç duhet skuadrën e tij për të
arritur një rezultat sa më të mirë këtë fundjavë, për ta nisur mbarë
vitin 2009.
Kuptohet që detyra është e vështirë për ta ruajtur vendin e parë,
por jo e pamundur. Lëvizjet e fundit në merkaton e dimrit, apo dhe
rikuperimi i disa lojtarëve që kanë pasur probleme me dëmtimet, e ka
rritur organikën në dispozicion të stafit drejtues kuqeblu. Tashmë
pritet për t’u parë se si do të reagojë skuadra në fushë. Sigurisht që
lojtarët nuk do ta kenë mendjen te ndeshjet e mëparshme, ato që në më
të shumtën e rasteve janë humbur.
Kjo nisur edhe nga fakti tjetër se edhe Shkumbini përgjithësisht ka
bilanc negativ në ndeshjet që ka zhvilluar në Shkodër, por në fazën e
parë ka arritur të barazojë 2 2 në “Loro Boriçi”. Një rezultat ky i
hidhur për kuqeblutë, por që në fund iu nënshtruan golave të
Rizvanollit. Çfarë do të ngjajë këtë herë në Peqin?
Kjo mbetet për t’u parë, por mbi të gjitha ajo çfarë ka rëndësi
është se pritet të zhvillohet një ndeshje shumë e bukur, ku secila
skuadër do kërkojë fitoren dhe fituesi nuk dihet cili do të jetë deri
në fund të 90 minutave.
Shiu, kundërshtari i madh i shkodranëve
Vllaznia nuk po përgatitet si duhet për ndeshjen e radhës me
Shkumbinin. Themi kështu, sepse kushtet atmosferike të ditëve të fundit
i kanë penguar ata të stërviten në mënyrën e duhur. Shirat e shumta që
kanë rënë prej një jave në Shkodër dhe që vazhdojnë të bien sërish, i
kanë bërë të gjitha fushat stërvitore të pamundura për të qenë në
dispozicion të këtij ekipi.
Nëse të hënën është provuar të stërvitet në fushën e Shtojit, nuk
ka ndodhur e njëjta gjë dje, prandaj kuqeblutë janë stërvitur në
ambiente të mbyllura. Trajneri Canaj është dukur shumë i shqetësuar nga
kjo situatë atmosferike, sepse në kushte të tilla nuk ka qenë në
gjendje të aplikojë asnjë skemë taktike apo lojë në fushë për t’u
përgatitur siç duhet për ndeshjen e së shtunës me Shkumbinin.