Ilir Rrushi: Ismaili, njeriu i duhur për Shkumbinin

Kryetari i Bashkisë Peqin, Ilir Rrushi, tregon miqësinë me presidentin Xhavit Ismaili
Kryebashkiaku i Peqinit, Ilir Rrushi, ka kërkuar të qetësojë sportdashësit peqinas, duke i dhënë përgjigjen e duhur ndonjë zëri të veçantë për probleme mes tij, bashkisë që ai drejton dhe presidentit të Shkumbinit, Xhavit Ismaili.
Për të është ekipi i Shkumbinit që i ka bashkuar dy vjet më parë, për t’u forcuar kjo lidhje e për t’u bërë miq. Kryebashkiaku peqinas e quan nder që ka njohur dhe ka bërë mik një njeri të tillë me cilësi të rralla, siç është Xhavit Ismaili.
Rrushi e ndien veten të qetë e të lumtur që ekipi i tij i zemrës, Shkumbini, ndodhet në duar të sigurta për sot e për nesër.
Zoti Rrushi, është folur ditët e fundit për një krisje të marrëdhënieve me presidentin e Shkumbinit, Xhavit Ismailin. Sa qëndron kjo?
Nuk është aspak e vërtetë dhe do të thoja që janë dashakeqe e të bëra nga njerëz të veçantë e me qëllime të caktuara. Marrëdhëniet tona kanë qenë e vazhdojnë të jenë normale me presidentin Ismaili e me donatorët e tjerë, “Euroteorema”, “Skela Syla” e donatorin Sula.
Gjej rastin t’i falënderoj për kontributin që kanë dhënë e vazhdojnë të japin për ekipin e Shkumbinit, në mënyrë të veçantë presidentin Ismaili, që po ia rrit edhe më shumë vlerat ekipit.
Po në planin personal si kanë qenë këto marrëdhënie me presidentin?
Me presidentin Ismaili ishte ekipi i Shkumbinit që na bashkoi në fillim, por sot mund të pohoj se jemi miq edhe familjarisht.
Unë jam krenar që jam njohur me një njeri të tillë me cilësi të rralla dhe që e konsideroj mik e peqinas të vërtetë. Janë këto cilësi që unë kam preferuar që si bashki, por edhe personalisht, t’ia besoj drejtimin e Shkumbinit plotësisht presidentit, duke qenë mjaft i kënaqur që gjithçka deri tani është bërë në mënyrën më të mirë.
Në çdo rast jemi konsultuar bashkë, por në fund ka qenë dhe mbetet presidenti ai që jep mendimin përfundimtar. Në çdo drejtim, presidenti ka mbajtur barrën më të madhe, pasi bashkia jonë, për vetë kushtet, nuk i ka mundësitë e duhura financiare për ta përballuar kampionatin, pa folur për përforcimet apo grumbullimet e ekipit.
Sa i pranishëm ka qenë presidenti Ismaili kohët e fundit në grumbullimin e ekipit në Ulqin apo në përforcimet në këtë periudhë?
Gjithçka që është bërë deri tani është meritë e padiskutueshme e mikut tim në radhë të parë, e presidentit Ismaili, përfshi këtu edhe grumbullimin 10 ditor në Ulqin në kushte mjaft të mira, por edhe përforcimet që kemi bërë.
Javën e kaluar ai e vizitoi ekipin në grumbullimin e Ulqinit dhe mbeti i kënaqur nga puna e bërë, që është një garanci për realizimin e objektivave që kemi si ekip për një vend nderi në kampionat e synimet në Kupën e Shqipërisë. S
igurimi i vendit të 5-të në përfundim të pjesës së parë të kampionatit e pas 17 javëve, në fakt është një vend mes më të mirëve e sukses për ekipin, por duhet pranuar që mundësitë i patëm për t’u ngjitur më lart. Me punën që është bërë këto ditë në Ulqin e me përforcimet e fundit, jam i bindur që edhe rezultatet nuk do të mungojnë.
Garancia më e madhe është mbështetja financiare e presidentit Ismaili, që jo vetëm për mua, por për të gjithë është më korrekti. Eshtë fat për mua, si qytetar e kryebashkiak, që të punoj me një njeri të tillë si Ismaili.
Sporti shqiptar
Ali Hallulli.