“Në Peqin s’kanë qenë të ngrohtë me mua, por unë vazhdoj për tifozët”

24 Janar Shkumbini/ Presidenti Ismaili: “Respektoj të gjitha kontratat që kam nënshkruar me lojtarët”

Duket se peqinasve u erdhi dita për t’u kthyer në shtëpi dhe faza përgatitore thuhet se ka qenë e kënaqshme. Mirëpo në opinionin futbolldashës peqinas kanë qenë të shumtë zërat për një largim apo tërheqje të presidentit Ismaili nga drejtimi i futbollit në qytetin e vogël të Shqipërisë së Mesme. Prej kohësh flitet se ka patur mosmarrëveshje midis presidentit të klubit bardhekaltër dhe kryetarit të Bashkisë së Peqinit, që ndonëse vetë Ismaili mundohet t’i mbulojë, duket se ende ekzistojnë. Megjithatë vetë Ismaili mendon, se në Peqin ka shumë arsye për të qëndruar dhe për të kontribuar. Së pari të qënit një tifoz do të thotë të kesh një lidhje të fortë të brendshme dhe së dyti, tifozët peqinas të cilët i falin një ndjesi të madhe. “T’ju them të vërtetën, ambjenti nuk ka qenë shumë i ngrohtë për mua. Kam menduar gjithnjë më të mirën për sportin në Peqin dhe këtë do të bëj edhe në të ardhmen për sportin në këtë qytet. Gjatë gjithë kësaj kohe do të qëndroj sërisht pranë klubit dhe do të kontribuoj me të gjitha detyrimet karshi lojtarëve dhe vetë ekipit. Me donatorët e ekipit kemi patur një mardhenie të mirë dhe jemi treguar mëse korrekt. Ju siguroj që kjodo të ndodhë edhe në të ardhmen, përderisa ne do të qëndrojmë këtu. Kemi bërë një fazë përgatitore të kënaqshme dhe unë e kam ndjekur para pak ditësh nga afër punën e ekipit. Shpresoj që ekipi do të shprehë më të mirën në ndeshjen e parë të kampionatit, duke kënaqur mbështetësit e shumtë. Kjo ndeshje na mban në garë për vendin e tretë, prandaj pres një rezultat pozitiv”, përfundon presidenti Ismaili.
Sport ekspres