Pashja: Shkumbini, pa dëmtime dhe probleme

Mbrojtësi peqinas Lorenc Pashja tregon nga Ulqini punën e mirë është bërë atje

Nesër ekipi i Shkumbinit mbush javën e qëndrimit në Ulqin ku është grumbulluar për zhvillimin e fazës përgatitore të dimrit. Futbollistët duken mjaft të motivuar, duke kërkuar t’i shfrytëzojnë sa më shumë e mirë kushtet që kanë gjetur. Këtë e përforcon edhe futbollisti peqinas Lorenc Pashja, kur shprehet se në ditët e Ulqinit çdo gjë ka shkuar më se normalisht, edhe pse ngarkesa në stërvitje ka qenë e lartë me dy seanca në ditë.

Një gjë e tillë për mbrojtësin Pashja u reflektua si duhet në takimin e parë miqësor që ka zhvilluar ekipi i tij, duke pasur përballë Lushnjën, që ndodhet në të njëjtin hotel me ta. Ai është i mendimit se kjo miqësore u shërbeu të dy ekipeve.

“Stërvitja 10 ditore që po zhvillojnë këto ditë në Ulqin për mua është nga grumbullimet që duhen veçuar për mënyrën e organizimit dhe për kushtet që na janë afruar. Kjo na ka nxitur për t’u stërvitur edhe më mirë, duke e pasur më të lehtë për të përballuar ngarkesën e lartë në stërvitje.

Kjo u pa mirë edhe në miqësoren e parë që zhvilluam në Ulqin, duke luajtur përballë ekipit të Lushnjës. Për mua nuk pati rëndësi rezultati, por gjithsesi treguam se po stërvitemi mirë dhe se 4 pikët që na mori Lushnja në kampionat ishin rastësi,” shprehet mbrojtësi peqinas Pashja, duke shprehur në njëfarë mënyre kënaqësinë që ekipi i tij mori “hakun” përballë lushnjarëve, por ama në miqësore e jo në kampionat.

Më tepër sesa rezultati i thellë 3 0, i shoqëruar edhe me lojën e mirë, 31-vjeçarin Pashja e bën optimist puna që po bën ekipi në stërvitje, ku harmonia e mirëkuptimi është ajo që bie në sy më shumë në ekip.

Për Pashjen, janë të gjitha mundësitë që të përsëriten rezultatet e mira të fazës së parë, ku e veçanta ishte që në çdo takim ekipi dinte të shënonte. Roli i tij në repartin e mbrojtjes mund të themi se ka qenë i pazëvendësueshëm, pasi Pashja ka qenë titullar në 17 ndeshjet, duke u renditur i dyti te Shkumbini, pas portierit Llani, pasi është zëvendësuar vetëm një herë për shkak dëmtimi, në ndeshjen e fundit me Lushnjën në Shijak.

Edhe pse nuk shkëlqen në lojë, veterani Pashja ka një stabilitet të përhershëm në fushë me rendimentin që jep për ekipin e vet, për me tepër që nuk i njeh ndëshkimet me kartonë, edhe pse është mbrojtës.

Sipas tij, në ekip ka filluar të ndihen “ethet” e takimit të parë me Vllazninë në Peqin, më 31 janar, për më tepër që ekipi shkodran ndodhet në të njëjtin vend e në të njëjtin hotel me Shkumbinin.

“Mund të deklaroj që këto ditë në Ulqin po bëhet një punë e mirë në stërvitje dhe, për fat, çdo gjë ka shkuar normalisht, duke mos pasur as edhe një dëmtim apo tërheqje muskulore. Kjo na bind se ekipi do t’i arrijë të tregojë vlerat në pjesën e mbetur të kampionatit.

Shorti na vë përballë ekipit shkodran që në javën e parë, duke qenë një mundësi e mirë për ne për të treguar se meritojmë më shumë,” - përfundon mbrojtësi “veteran” i Shkumbinit, Lorenc Pashja.
Ali Hallulli
Sporti shqiptar