Magani, i kënaqur nga java e parë ulqinake

Trajneri i Shkumbinit, Gugash Magani, tregon për javën e parë stërvitore në Ulqin
Një javë stërvitje në qendrën e grumbullimit në hotelin “Olimpik” në
Ulqin, i ka shërbyer trajnerit Magani për të krijuar një ide më të
plotë për grupin e lojtarëve që ka në dispozicion, por edhe për nevojat
e ekipit për ta përballuar si duhet pjesën e mbetur të kampionatit.
Për Maganin, më e rëndësishme është që gjithçka deri tani është
zhvilluar sipas programit të përcaktuar më përpara, duke u dhënë
ngarkesa e duhur në stërvitje gjatë dy seancave që zhvillon ekipi
paradite e pasdite.
“Po përpiqemi t’i shfrytëzojmë në mënyrën më të mirë kushtet që kemi
gjetur në Ulqin, duke u stërvitur rregullisht dy herë në ditë. Për fat,
edhe moti ka mbajtur këto ditë, duke na favorizuar në punën tonë për ta
shfrytëzuar çdo seancë, me synimin për t’u përgatitur ashtu si duhet.
Duhet pranuar që ngarkesa në stërvitje ka qenë e lartë, por ajo
është përballuar nga i gjithë grupi i futbollistëve dhe për fatin e
mirë gjatë këtyre ditëve nuk kemi pasur asnjë dëmtim, apo tërheqje
muskulore,” - deklaron trajneri Magani, duke folur për punën një javore
të ekipit në Ulqin.
Ditët e grumbullimit në Ulqin, trajneri Magani kërkon t’i
shfrytëzojë edhe për zhvillimin e ndeshjeve miqësore, duke përfituar
nga prania e ekipeve të tjerë, si Lushnja apo Bylisi, pa harruar ata
vendës, duke përjashtuar përballjen me Vllazninë, ekip që ndodhet në të
njëjtin hotel me Shkumbinin.
Asnjëri nuk e kërkon një miqësore të tillë, sepse të dy ekipet do të
ndeshen që në javën e parë, më 31 janar, me njëri tjetrin. Miqësorja e
parë që zhvilloi Shkumbini të shtunën e kaluar me Lushnjën në Ulqin, e
la të kënaqur trajnerin Magani.
Në këtë miqësore të fituar 3 - 0, ai u dha mundësi të gjithë
futbollistëve që pati në dispozicion për t’u provuar, duke veçuar
harmonizimin e veprimeve, sidomos lojën e autorëve të golave. Krahas
stërvitjes, kemi planifikuar që t’i shfrytëzojmë edhe më mirë ditët e
grumbullimit për të zhvilluar disa miqësore.
Kjo do të na shërbejë për të parë më mirë gjendjen e ekipit përpara
rifillimit të kampionatit. Miqësorja që zhvilluam me Lushnjën u shërbeu
futbollistëve, por edhe stafit, prandaj dhe kemi planifikuar një tjetër
miqësore me Bylisin në mesjavë.
Për mua një miqësore me një ekip në të tilla grumbullime vlen më
shumë se një seancë stërvitore, sepse është stërvitja më e mirë dhe të
jep më shumë mundësi për të parë e për të korrigjuar më pas,” - ka
shtuar më tej Magani.
Mbrojtësi 23-vjeçar serb A.Mujdragiç akoma nuk e ka marrë përgjigjen
përfundimtare nga drejtuesit, që me sa duket nuk duan të nxitohen. Mund
të jetë miqësorja me Bylisin prova më e mirë për futbollistin serb, që
ka luajtur me ekipin e Novi Pazarit.
Përshtypjet për lojtarin e ri serb janë të mira, por deri ditën e
djeshme asgjë nuk ishte vendosur, kur më parë një bashkatdhetar i tij,
pasi u provua dy ditë me Shkumbinin, u la i lirë nga drejtuesit si i
panevojshëm.
Gjatë këtyre ditëve në Ulqin kanë ardhur në provë disa futbollistë,
kryesisht serb, por për momentin, përveç Jaksimoviç, që ka firmosur,
është duke u vëzhguar mbrojtësi Ahmet Mujdragiç, i cili prej disa
ditësh stërvitet me ekipin.
Shkumbini, sot miqësore me Bylisin
Ekipi i Shkumbinit pritet të zhvillojë sot në qytetin e Ulqinit
miqësoren e dytë, duke pasur si kundërshtar ekipin e Bylisit, që
ndodhet në të njëjtin hotel me Shkumbinin. Eshtë një mundësi e mirë për
Maganin, por edhe për Dedjen, për të parë gjendjen e ekipeve 10 ditë
para rifillimit të kampionatit, ku Shkumbini do të presë Vllazninë,
ndërsa ekipi i Dedjes do të presë Partizanin në Ballsh.