Sot, nisja drejt Malit të Zi. Magani: Nora s’do të largohet

Skuadra e Shkumbinit ka
vijuar ritualin e stërvitjes
ditën e djeshme në fushën
sportive të qytetit dhe sot
pritet të niset drejt Malit të
Zi, ku do të zhvillojë minifazën
prej gati 10 ditësh. Ne
stërvitjen e djeshme trajneri
Magani dhe ndihmësi i tij
Branica i kanë pasur në dispozicion
të gjithë futbollistët,
duke përfshirë këtu edhe
mesfushorin e sapoblerë nga
merkato serbin, Igor Jaksimoviç.
Ndërsa trajneri i portierëve,
Arianit Ballhysa, një
ish-portier i Shkumbinit si
çdo ditë merret me stërvitjen
e gardianëve bardhekaltër
Llani dhe Birja. Në grupin e
futbollistëve binte në sy
dëshira e madhe për t’u impenjuar
sa më mirë përpara
trajnerëve dhe më i rëndësishëm
është fakti që edhe
ata lojtarë që vinin pas dëmtimesh
në javët e fundit,
duken t’i kenë lënë pas ato
dhe kanë gjetur formën e tyre
më të mirë. Bëhet fjalë për
sulmuesin tiranas Rizvanolli
dhe mesfushorin maqedonas
Deliovski, që të dy të rikthyer
me skuadrën pas gati
pesë javësh mungesë për arsye
dëmtimi. Në përfundim,
grupi është ndarë duke formuar
dy skuadra ndërmjet të
cilave u zhvillua edhe një
ndeshje kontrolli, që zgjati
vetëm 30 minuta. Pas përfundimit
të saj trajneri Magani
ka dhënë udhëzimet e
fundit rreth përgatitjeve dhe
pajisjeve që duhet të marrin
me vete futbollistët kur të nisen
drejt Ulqinit. Grumbullimi
i tyre do të bëhet sot në
orën 10:00 dhe do të kryhet
edhe një stërvitje e shkurtër
gjatë paradites. Ndërsa ndihmësi
i tij, Branica, ka lexuar
emrat e atyre që do të
udhëtojnë për në qytetin
bregdetar. Ai u shpreh se
nëse ndonjë nga futbollistët
nuk e ka dëgjuar emrin në
këtë listë, mund të kontaktojë
me presidentin Xhavit
Ismaili për sqarime të mëtejshme.
Kjo tregon se nga
radhët e Shkumbinit mund
të ketë edhe largime të atyre
të lojtarëve që nuk shikohen
të jenë të nevojshëm për
skuadrën.
Konfirmimi
Në lidhje me lajmin që ka
qarkulluar në disa media
sportive se, futbollisti
gjirokastrit që luan në radhët
e Shkumbinit, Arlind Nora,
ka kërkuar të largohet, pranoi
të prononcohet vetë për
“Panorama Sport” trajneri
Gugash Magani duke thënë:
“Nora është pjesë e skuadrës
së Shkumbinit dhe ato që thuhen
në gazeta janë të pavërteta,
prandaj dua të theksoj
edhe njëherë se ky futbollist
do të vazhdojë të qëndrojë në
skuadrën tonë sipas kontratës
që ka me klubin tonë”,
përfundon Magani. Me këtë
prononcim, trajneri peqinas,
Magani, u jep fund spekulimeve
të fundit për një largim
të Norës drejt ndonjë ekipi
tjetër. F. Ahmeti