Shkumbini, grumbullimi nis me analizë

Futbollistët e Shkumbinit pritet ta nisin sot pasdite stërvitjen për fazën përgatitore të dimrit, pas disa ditësh pushim për shkak të festës së Vitit të Ri e të ndërprerjes së kampionatit. Madje një takim që pritet me interes është edhe analiza e pjesës së parë të kampionatit, ku do të marrin pjesë edhe drejtuesit, përfshi edhe presidentin Ismaili.

Në këtë takim pritet të zbardhen edhe disa detaje për të ardhmen e ekipit e për objektivat që ka Shkumbini. Në fakt, ky takim ishte planifikuar të zhvillohej një javë më parë në vitin e kaluar e më konkretisht dy ditë pas ndeshjes me Lushnjën në Shijak për javën e 17 të, por që u anulua nga vetë presidenti Ismaili.

Sipas informacionit që kemi, si shkak shërbeu ndeshja e fundit me Lushnjën, ku më shumë se rezultati 1 1, ishte loja e dobët që zhvilloi ekipi që i la të zhgënjyer drejtuesit. Pritet që sot të mësohen edhe të rejat më të fundit për lëvizjet e lojtarëve.

Magani pohon se është në përfundim të planit stërvitor për periudhën e ndërprerjes së kampionatit, kur ka planifikuar edhe një grumbullim 10 ditor të ekipit në një qendër stërvitore, por pa qenë në gjendje të japë detaje më shumë.

“Pothuaj e kam përfunduar planin stërvitor për këtë periudhë përgatitore, nuk mund të jap të dhëna se ku do të zhvillohet stërvitja për këto ditë.

Për nesër (sot) paradite kemi planifikuar një takim me presidentin, ku do të paraqes argumentet e mia për t’i shfrytëzuar sa më mirë këto ditë. E shoh si të nevojshme që ekipi të grumbullohet për 10 ditë në një qendër stërvitore, pasi do të shërbejë në përgatitjen tonë.

Gjithashtu do të bisedojmë konkretisht për përforcimet në ekip, pa harruar edhe ndonjë seleksionim të grupit për ata futbollistë që nuk e kanë justifikuar veten gjatë 17 javëve të para të kampionatit.

Më pas do të jetë vetë presidenti Ismaili, që do të vendosë për më tej me synimin që Shkumbini të paraqitet më mirë për gjysmën e dytë të kampionatit,” - deklaron trajneri Magani.
Ali Hallulli
5/1/09
Sporti Shqiptar