Rizvanolli premton rikthim vendimtar në skuadër

Një paraqitje dinjitoze dhe e kënaqshme mund të quhet paraqitja
që ka bërë skuadra e Shkumbinit deri në këtë pjesë të
sezonit, e drejtuar me mjeshtëri nga dy profesorë vendës si
Gugash Magani dhe ndihmësi i tij, Sokol Branica. Në 17 javë
kampionat, skuadra bardhekaltër ka arritur shifra deri diku të
mira, teksa ka koleksionuar gjithsej 6 fitore, 5 humbje dhe 6
barazime, kur akoma nuk ka mbaruar faza e dytë, e cila do të
nisë në fund të janarit 2009. Me këto rezultate gati të ekuilibruara,
peqinasit mbajnë vendin e pestë me pikë të barabarta
me Teutën e Durrësit. Drejtuesit e Shkumbinit premtojnë që
në fillimin e gjysmësezonit tjetër, do të realizojnë qëllimin për
t’u ngjitur më lart në klasifikim si edhe afrimin e lojtarëve gjatë
merkatos së janarit. Në
planet e stafit bardhekaltër
janë një mbrojtës
dhe një mesfushor, i cili
do të jetë i aftë ta organizojë
si duhet këtë repart.
Mirëpo nuk jepen
emra konkretë, pasi
ende nuk është vendosur
se cilët lojtarë do të
afrohen. Sulmuesi tiranas,
Erion Rizvanolli,
që mban veshur
fanellën bardhekaltër
dhe njëkohësisht golashënuesi
më i mirë i ekipit,
e ka hedhur tashmë
pas krahëve dëmtimin
në kavilje që e mbajti larg
fushave të blerta për
gati 5 javë dhe tashmë
është i gatshëm për t’u
vënë nën urdhrat e trajnerit
me fillimin e kampionatit
pas fazës së
ndalesës së janarit. Ky i fundit shpreh keqardhjen për mungesën
e tij në sfidat delikate, pasi dëmtimi nuk e lejonte të
luante as edhe për disa minuta në fushën e blertë. “Mendoj
se është dëshira e çdo sulmuesi për të shënuar dhe për të
ndihmuar skuadrën për të cilën ai luan. Mirëpo edhe dëmtimet
janë pjesë e pandarë e karrierës së një futbollisti, që e
pengojnë atë. Tashmë mendoj vetëm për rikthimin dhe për të
shënuar sa më shumë, në mënyrë që t’ia shpërblej skuadrës
dhe stafit drejtues besimin që kanë te mua. Një falënderim të
veçantë kam edhe për tifozerinë peqinase, të cilës dua t’i
uroj një vit të ri sa më të mbarë dhe të besojë te ky ekip,
sepse kemi akoma për të bërë dhe mbështetja juaj do të jetë
mjaft e nevojshme”, përfundon prononcimin e tij sulmuesi
bardhekaltër, Erion Rizvanolli. Fatmir Ahmeti
Panorama sport