Stadiumi i Shijakut, “tersi” i Shkumbinit

Me barazimin 1 1 të arritur të premten me ekipin e Lushnjës, Shkumbini ka humbur mundësinë më të mirë për t’u ngjitur edhe më lart në renditje.

Për të gjithë konsiderohen dy pikë të humbura, sepse ndeshja u luajt në fushën asnjanëse të Shijakut dhe Shkumbini në këtë takim ishtë larg pretendimeve që ka.

Edhe një herë stadiumi “Tofik Jashari” mund të konsiderohet ters dhe i pafat për Shkumbinin, pasi në 5 ndeshje të zhvilluara nuk ka fituar asnjëherë.

Mungesa e fitores e shoqëruar me lojën e dobët i ka lënë të zhgënjyer sportdashësit peqinas, që e ndoqën në shi takimin, duke dalë në konkluzionin se nuk meritonte më tepër.

Ndryshe nga një javë më parë, kur luajtën përballë Elbasanit në Peqin, të premten përballë Lushnjës, Shkumbini luajti pa dëshirë e pa mendimin e duhur me shumë gabime, ku repartet nuk funksiononin si duhet e secili sikur luante për hesap të vet.

Ndoshta në lojën e ekipit të Maganit ndikoi edhe dalja e mesfushorit me tipare mbrojtëse Lorenc Pashja për shkak dëmtimi, por duhet pranuar se loja e Shkumbinit nuk ishte bindëse.

Dobësitë më të mëdha në lojën e Shkumbinit u panë në pjesën e parë, kur ekipi nuk diti të orientohej në fushë dhe për pasojë nuk arriti të rrezikojë për asnjë moment portën kundërshtare.

Këtë e pranon edhe trajneri Magani, duke iu kënaqur pikës së marrë, sepse ashtu siç erdhi loja, Lushnja mund t’i kishte shkaktuar humbjen e dytë Shkumbinit, atë që nuk e ka bërë asnjë ekip tjetër deri tani.

Nderin e Shkumbinit e vë në vend sulmuesi gjirokastrit Nora, i cili ka meritën pasi mori vetë gjithçka përsipër, duke barazuar rezultatin 5 minuta përpara përfundimit me një gol shumë të bukur.

Në fakt, ishte barazimi, që përpara ndeshjes, nuk i hynte në punë asnjë ekipi, por që në përfundim i shërbeu më shumë Shkumbinit, nisur edhe nga rezultatet e rivalëve të drejtpërdrejtë të Teutës e Flamurtarit.

Shkumbini ngjitet tani në vendin e 5 të, ndërsa Lushnja përfundon në fund të tabelës. Magani nuk i fsheh pakënaqësitë për lojtarë të veçantë, që shfaqën dobësi.

Sipas Maganit, do të jetë merkatoja e janarit me përforcimet e menduara që do ta bëjnë më reale arritjen e objektivave.

Ali Hallulli
Sporti shqiptar