Ismaili: Kavaja e kishte gati “skenarin”

Presidenti i Shkumbinit, Xhavit Ismaili, falënderon të tijtë për qëndrimin e mbajtur[/b]
Presidenti i Shkumbinit, Xhavit Ismaili, dje ka pasur një takim të shkurtër me ekipin përpara fillimit të stërvitjes. Duke mos u marrë fare me rezultatin e ndeshjes, numri një i klubit bardhekaltër i ka falënderuar futbollistët dhe stafin për qëndrimin korrekt dhe me kulturë që kanë mbajtur, duke përballuar presionin e tifozëve vendës. Ai premton se, në rast kualifikimi të dy ekipeve, Shkumbinit e Besës, për turin tjetër të kupës, nuk do të ketë “hakmarrje”, por gjithçka do të vendoset në fushën e lojës.
Përpara fillimit të stërvitjes patët një takim të shkurtër me futbollistët e stafin. Për çfarë u bisedua?
Ishte një takim i zakonshëm, por këtë radhë e vlerësova të domosdoshme për të biseduar me ta. Unë i falënderova për korrektësinë dhe shpirtin e garës që treguan në Kavajë të shtunën e kaluar. Ishin këto dhe kultura që tregoi i gjithë ekipi i Shkumbinit, që ditën të shmangin aktet e dhunshme të tifozëve kavajas.
Mjaftoi vetëm ky vlerësim për ekipin, pasi ishte e kotë të bëhej analiza e rezultatit, sepse për mua nga mënyra se si u zhvillua ndeshja, ajo nuk ishte lojë futbolli. Unë gjeta rastin ta falënderoj ekipin tim, që diti të tregojë kulturën sportive gjatë gjithë kohës, duke shmangur acarimin më tej të situatës së krijuar, për t’ua lënë të tjerëve që ta analizojnë si duhet.
Përse erdhi gjithë ky presion i kavajasve?
Për mua ndodhi gjithçka sepse presidenca e Besës e kishte planifikuar dhe paramenduar një gjë të tillë dhe nuk ishte e rastit. Ishin familjarët e tyre dhe të disa futbollistëve të veçantë të Besës protagonistët kryesorë që e organizuan, duke ushtruar dhunë verbale e terror psikologjik ndaj futbollistëve dhe të stafit drejtues të Shkumbinit.
Unë e kam deklaruar dhe e përsëris, që jam kundër këtyre veprimeve të dhunshme, i kam dënuar dhe i dënoj ashpër dhe nuk do të lejoj që akte të tilla të përsëriten. Të bën përshtypje qëndrimi i presidencës së Besës dhe i disa futbollistëve të veçantë të ekipit, që nuk mbajtën asnjë qëndrim, duke i quajtur normale këto fenomene të dënueshme. Unë personalisht distancohem e të njëjtën gjë duhet ta kishin bërë edhe ata.
Gjithsesi, ra në sy mungesa juaj në Kavajë të shtunën. Si shpjegohet?
Unë nuk isha i pranishëm në Kavajë, sepse i pata marrë informacionet e duhura për atë që përgatitnin. Doja që të mos isha dëshmitar i skemave të tilla të turpshme dhe të dënueshme, që nuk e nderojnë Kavajën.
E pata porositur ekipin që të tregohej i kujdesshëm, për t’iu shmangur çdolloj provokimi dhe pranoj sot me kënaqësi që jam i kënaqur nga qëndrimi i tyre. Dua të veçoj qëndrimin korrekt të mbrojtësit Daniel Ramazani, i cili përballë dhunës fizike të sulmuesit të Besës, arriti të ruajë gjakftohtësinë, por, për çudi, u shpërblye me karton të kuq nga gjyqtari.
Shkumbini pret Apoloninë për ndeshjen e dytë të kthimit. Si e mendoni?
Përpara ngjarjeve të tilla, nuk ka shumë rëndësi rezultati i një ndeshjeje për kupë e kampionat. Duke e mbyllur ngjarjen e fundit të Kavajës, do të thoja se të tilla ngjarje nuk kanë ndodhur më parë në futbollin tonë, prandaj duhet t’u pritet rruga që në fillim.
Për sa i takon ndeshjes me Apoloninë, do të kemi përballë një ekip simpatik, me futbollistë të rinj e të përgatitur që luajnë futboll me dëshirë. Jemi ndeshur dy herë dhe e njohim mirë kundërshtarin, prandaj dhe e kemi vlerësuar, duke kërkuar të bëjmë më të mirën tonë me synim kualifikimin.
[b]Shkumbini-Besa, dueli mund të vazhdojë…
Në rast kualifikimi të Shkumbinit në kupë, sipas shortit, do të vihet përballë Besës, gjithmonë duke u nisur nga rezultatet e ndeshjeve të para dhe synimeve të dy ekipeve. “Për mua dhe për ekipin tim nuk ka asnjë problem, por kam besim të plotë se do të kualifikohemi ne dhe Shkumbini do të vazhdojë rrugën më tej.
E garantoj Besën dhe drejtuesit e saj se Shkumbini do të dijë të fitojë në fushën e lojës dhe jo me format e metodat që përdori Besa,” - thekson presidenti Ismaili. Deri më 29 shkurt, kur është turi i ardhshëm i kupës, shpresohet që ndodhitë e fundit të mos ndikojnë, nëse këto ekipe përplasen sërish në kupë, pa harruar ndeshjen e fazës së tretë në kampionat.
Ali Hallulli
Sportishqiptar