Magani: Shkumbini ia lehtësoi vetë punën Bylisit

Trajneri pranon se ekipi i tij gaboi në mbrojtje, duke i dhënë mundësi kundërshtarit të shënojë

Pas gati 4 muajsh, Shkumbini pëson humbjen e dytë jashtë fushe. Pra, që nga 30 gushti, kur regjistronte humbjen e parë, me Dinamon, Shkumbini ka ditur të mos i ndahet rezultatit pozitiv, duke barazuar apo fituar në Elbasan, Shkodër, në Tiranë me Partizanin dhe në Vlorë. Peqinasit shënuan edhe në Ballsh golin e barazimit, por nuk e shmangën dot humbjen, që për mënyrën si u pësua, i la të pakënaqur tifozët e Shkumbinit, që ishin të pranishëm në stadiumin e Ballshit.

Shkumbini i së dielës ishte larg paraqitjeve të mëparshme, ndaj ua bëri më të lehtë fitoren ballshiotëve, të cilët luajtën të mobilizuar. Goli i parë u pësua pas një goditjeje standarde, ndërkohë që Shkumbini kishte shpërdoruar më parë shumë raste të tilla. Në lojën e Shkumbinit mungoi edhe qartësia në sulm, kështu që iniciativa vazhdimisht u kalonte vendësve.

Ndryshe nga takimet e mëparshme, ku mbrojtja ka qenë reparti më i konsoliduar, me Bylisin ka gabuar në krahë, por edhe në qendër. Nisur nga rezultatet dhe nga pozicioni në tabelë, për Shkumbinin ishte një humbje e papritur, por që e ktheu me këmbë në tokë, për më tepër që përpara takimit kishte një optimizëm të pajustifikuar.

Gjithsesi, trajneri Magani kërkon ta lërë pas këtë humbje, kur shprehet: “Në përgjithësi, ekipi luajti mirë, duke kërkuar maksimumin, por futbolli kështu e ka, duhet të shënosh që të fitosh. Ishte e pajustifikueshme për Shkumbinin tërheqja pas golit të barazimit, duke i dhënë mundësi Bylisit të sulmojë. Bylisi shënoi golin e dytë pa shumë mund, me ndihmën e mbrojtjes sonë, që e la të lirë K.Dalipin. Bylisi e meritoi fitoren, sepse i shfrytëzoi gabimet e Shkumbinit.”

Trajneri Magani shpreson që gabime si ato të ndeshjes së fundit të mos përsëriten. “Ndeshjen me Bylisin e kishim vlerësuar dhe nuk e prisja atë rezultat, por gabuam në dy momente, në një goditje dënimi dhe në një kros, që mendoj se mund të ishte neutralizuar nga mbrojtja,” - shprehet më tej trajneri Magani. Shkumbini vazhdon të qëndrojë në vendin e 3-të, pasi këtë javë ka përfituar nga rezultatet e rivalëve.
Autori: Ali Hallulli
Data: 25/11/2008
sporti shqiptar