Sula: Humbja me Lushnjën do të më dalë në ëndërr

Për të ndjekur takimin e djeshëm Elbasani-Tirana në shkallët e
stadiumit “Ruzhdi Bizhuta” ka qenë i pranishëm edhe deputeti
njëkohësisht edhe donator i Shkumbinit, Dashnor Sula. Ai pas
përfundimit të ndeshjes mes verdhebluve e bradhebluve, ka kujtuar
ndeshjen e humbur nga Shkumbini ndaj Lushnjës, takim i cili
nëse do të ishte fituar nga ana e peqinasve, atëherë Shkumbini
sot do të ishte në krye të tabelës së klasifikimit me 21 pikë. Lidhur
me këtë ndeshje deputeti është shprehur me shaka: ”Lushnja do
të më dalë në ëndërr sonte, sepse nëse do kishim fituar ndaj saj,
do të ishim në vend të parë në tabelën e klasifikimit”. Ndërkohë të
njëjtin mendim ka pasur dhe Xhavit Ismaili, presidenti i Shkumbinit,
i cili së bashku me Sulën kanë qenë
të pranishëm në tribunën vip për
të ndjekur supersfidën e javës së
dhjetë Elbasani-Tirana.
Optimizmi
“Jemi të kënaqur dhe duhet të
vazhdojmë të ruajmë këtë ritëm,
pasi tani Shkumbini është realitet
për të gjithë. Luan bukur, fiton në
shtëpi në javën e dhjetë të kampionatit
dhe e gjen veten në vendin
e tretë me pikë të barabarta me
Vllazninë, që mban vendin e dytë”,
është shprehur në fillim të fjalës
së tij zv/trajneri i Shkumbinit Branica.
Atmosfera e gëzueshme dhe
festive ka vazhduar edhe pas fitores
me Apoloninë e Fierit, teksa
të gjithë, futbollistë, drejtues e
sponsorë shtrënguan duart mes
tyre dhe iu falën momentit të shkëlqyer
që po kalon skuadra e tyre.
Me të vërtetë që ekipi i Shkumbinit
ka bërë më të mirën në këtë fazë
të parë, duke fituar ndeshje të
vështira në shtëpi e transfertë, ka barazuar me tri pretendente
për titull dhe ka sigluar vetëm dy humbje. Këto rezultate e mbajnë
Shkumbinin në majat e klasifikimit, duke ia shtuar më tepër oreksin
për fitore edhe në ndeshjet e tjera. “Jemi duke kaluar një nga
periudhat tona më të mira përsa u përket paraqitjeve në kampionat,
duke mbajtur me meritë pozicionin në tabelën e klasifikimit. E
gjitha kjo ka ardhur si rezultat i punës së mirë dhe mbështetjes së
presidentit Ismaili e sponsorëve të tjerë”, u shpreh në përfundim
të fjalës zv/trajneri Branica.
Aldi Kozaria/Fatmir Ahmeti
Panorama sport