Shenaj, optimist për vazhdimësinë e Shkumbinit

Mesfushori gjirokastrit Fejzo Shenaj kërkon që Partizani të vlerësohet realisht

Në takimin e djeshëm për kupë me Gramozin në Ersekë, Shkumbini ka luajtur pa disa nga titullarët e ekipit që kanë qëndruar në Peqin dhe janë stërvitur nga zëvendëstrajnerin Branica. Trajneri Magani, duke menduar më shumë për ndeshjen e radhës me Partizanin të shtunën, përfitoi që t’u krijonte më shumë hapësira futbollistëve të tjerë që janë aktivizuar pak gjatë 8 javëve të para.

Mesfushori Fejzo Shenaj ishte njeri nga titullarët e Shkumbinit që u la pushim për ndeshjen e kupës, krahas Rizvanollit, Norës, Pashjes. Për Shenajn, kjo është e justifikueshme, pasi me Tiranën ekipi harxhoi shumë energji, ndërkohë që një tjetër takim të rëndësishëm e pret Shkumbini të shtunën kur do të përballet me Partizanin.

Për gjirokastritin e Shkumbinit, mesfushorin Shenaj, Shkumbini meritonte më shumë me Tiranën, por dëshira mbeti vetëm dëshirë, për më tepër që mungesa e golit, me gjithë rastet që pati. “Ndonjëherë në futboll duhet të kesh edhe pak fat dhe ky na mungoi në ndeshjen me Tiranën.

Megjithatë, duhet pranuar që loja e ekipit tonë ka ardhur në ngritje dhe po harmonizohet më mirë nga ndeshja në ndeshje. Kjo u pa më mirë në ndeshjen me Tiranën, ku për mua, ne meritonim fitoren, por nuk arritëm të shënonim. Duhet pranuar që Tirana vuajti shumë në Peqin, ndoshta edhe më shumë sesa në ndeshjet e tjera, sepse pati presionin e vazhdueshëm të ekipit tonë gjatë gjithë lojës,” - deklaron Shenaj.

Mesfushori i Shkumbinit kërkon që të ruhet ritmi i punës dhe vazhdimësia e lojës së ekipit për të dëshmuar se Shkumbini i meriton rezultatet dhe vendin në renditje. Prova më e mirë do të jetë ndeshja e radhës të shtunën me Partizanin.

Duke e njohur mirë forcën e ekipit të tij, por edhe të kundërshtarit, Shenaj ka besim te forca e ekipit. Ai kërkon që kundërshtari i radhës të vlerësohet për emrin dhe traditën që ka, pasi me ardhjen e trajnerit të ri, ekipi i Partizanit do të përpiqet të reagojë dhe çdo nënvlerësim do të ishte me pasoja për Shkumbinin e do t’i çonte dëm rezultatet e arritura javët e fundit. “Të shtunën do të përballemi në Tiranë me Partizanin në një ndeshje të vështirë e të rëndësishme për të dy ekipet.

Eshtë një mundësi e mirë e ekipit tonë për të qenë në vazhdën e dy ndeshjeve të fundit, për të treguar që Shkumbini i këtij sezoni qëndron më lart dhe është më i organizuar. Duhet ta vlerësojmë realisht për emrin dhe traditën që ka dhe jo duke u nisur nga rezultatet e javëve të fundit. Partizani është një ekip me përvojë që di të reagojë e të marrë veten shumë shpejt. Duhet të synojmë që në fillim për të dalë në lojën tonë, për ta pasur më të lehtë më pas,” - përfundon mesfushori Fejzo Shenaj, me synimin për rezultat pozitiv me Partizanin.

Ali Hallulli
Data: 30/10/2008