Magani: Nuk na dhuroi gjë Elbasani

Trajneri i Shkumbinit, Gugash Magani, shprehet se ekipi e meritoi pikën në transfertë

Ekipi i Shkumbinit ka arritur të marrë një pikë në ndeshjen e zhvilluar të dielën në “Ruzhdi Bizhuta” përballë Elbasanit vendës. Ka qenë një barazim i merituar i këtij ekipi në ndeshjen derbi, i arritur në fundin e takimit me autogolin e Stojkut. Të besuarit e Maganit e konsiderojnë sukses pikën e marrë në Elbasan, duke u dhënë përgjigjen e merituar vendësve në fushën e lojës. Shkumbini pati meritën se diti t’i administrojë mirë forcat në të tri repartet, duke arritur ta ngrejë nivelin e lojës në pjesën e dytë deri në fund të takimit. Ishin këto minutat më të mira të Shkumbinit, kur ekipi po luante me një futbollist më pak, pas daljes së Mustafait me dy kartonë të verdhë. Shkumbini ngulmoi deri në fund dhe ia arriti qëllimit. Goli i Shkumbinit nuk ishte i rastit, por i pritshëm nga çasti në çast, pasi për minuta të tëra po dominonte në fushë, edhe pse me një futbollist më pak. Për trajnerin Magani, ishte një rezultat që iu përgjigj nivelit të lojës dhe që Shkumbini e meritoi dhe që ishte objektivi i tyre për të ruajtur pozicionin në tabelën e renditjes. “Ishte një ndeshje e bukur e me rivalitet deri në fund. Barazimin e merituam me lojën që zhvilluam dhe nuk na e dhuroi Elbasani. Ishte objektivi ynë përpara ndeshjes dhe djersitëm për ta gjetur golin e barazimit. Elbasani kaloi në avantazh falë një gabimi foshnjarak që bëri mbrojtësi Xhyra, duke shkaktuar penallti. Ekipi besoi deri në fund dhe, kur mbetëm me 10 lojtarë, treguan forcë karakteri, duke e rritur nivelin e lojës. Për mua, barazimi ishte rezultati më i drejtë dhe realizimi i objektivit që ne patëm,” - deklaron trajneri Magani, i kënaqur me pikën e marrë përballë Elbasanit. Trajneri i Shkumbinit e vlerëson shumë këtë pikë jo vetëm se u luajt në transfertë. Rezultati i arritur dhe paraqitja dinjitoze e ekipit në Elbasan, për Maganin, ishte përgjigjja më e mirë që u jep ekipi i tij të gjithë atyre që kërkojnë të mohojnë djersën e derdhur dhe rezultatet e ekipit në 5 javët e para. “Përveç pikës që morëm, duke ruajtur vendin e dytë në tabelë, barazimi i arritur në Elbasan pati vlera të mëdha për momentin, duke u treguar atyre që kërkojnë të na mohojnë djersën e na kanë quajtur të dhunshëm, siç ishte rasti i parullës në Elbasan. Ekipi, me lojën që zhvilloi, tregon se i meriton plotësisht rezultatet e arritura, si dhe pozicionin që ka në tabelë,” - përfundon trajneri i Shkumbinit, Gugash Magani.

Shkumbini, edhe dje dy seanca stërvitore
Festa e Bajramit të Madh për futbollistët e Shkumbinit ka qenë një ditë e zakonshme stërvitjeje, kur ekipi ka zhvilluar dy seanca. Ekipi vinte pas ndeshjes së të dielës në Elbasan me ekipin vendës, që përfundoi në barazim 1 1, dhe Magani preferoi që të hënën, të nesërmen e ndeshjes, futbollistët të bënin pushim. Dje paradite, trajneri Magani ka punuar në palestër, duke pasur në dispozicion vetëm futbollistët peqinas, ndërsa të tjerët janë stërvitur në qytetet e tyre, ashtu si gjithmonë, kur ka seanca paradite, sipas udhëzimeve të dhëna. Pasdite i gjithë grupi është bashkuar, për të nisur përgatitjet për takimin e radhës me Lushnjën në Peqin.