Isaj parashikon një derbi të qetë në Elbasan

Ashtu si sekretari Kovaçi, edhe Astrit Isaj thotë se ndeshja do të jetë pa probleme

Edhe pse nuk ka qenë aspak e lehtë për ta, futbollistët e Shkumbinit
janë përpjekur të përqendrohen në përgatitjen e radhës. Të dielën do të
udhëtojnë drejt Elbasanit, për t’u ndeshur me ekipin vendës në
stadiumin “Ruzhdi Bizhuta”. Kjo përballje është cilësuar me të drejtë
si derbi i prefekturës, prandaj edhe interesimi është i madh, ashtu si
gjithmonë, pavarësisht se ku është zhvilluar takimi, në Elbasan apo
Peqin. Shkumbini shkon në këtë takim duke qenë më lart në renditje, në
vendin e dytë, një pikë më shumë se kundërshtari i radhës, Elbasani, i
vendit të tretë. Vendësit do të kërkojnë të ndërrojnë vendet në tabelë
për t’u ngjitur më lart, ndërsa Shkumbini për ta ruajtur këtë pozicion.
Do të jetë fusha e lojës ajo që do ta tregojë më mirë, pasi të dy
ekipet do të përpiqen të realizojnë objektivat e tyre, duke reflektuar
punën e bërë. Ky takim, ashtu si përherë, pritet të ndiqet nga një
numër i madh sportdashësish elbasanas, por edhe nga Peqini. Këtë e
pohon edhe sekretari i klubit, Astrit Isaj, i cili tregon edhe masat që
po merren nga ana e klubit në bashkëpunim me atë të Elbasanit për
organizimin sa më mirë e sistemimin e tyre. Sekretari Isaj nuk ngurron
të nënvizojë edhe marrëdhëniet e mira midis dy qyteteve fqinje, me
miqësi të vjetra e të reja, por edhe të dy klubeve. Për sekretarin
Isaj, gjithnjë midis këtyre dy ekipeve është luajtur fort e pa
kompromis, ku në fund ka fituar më i miri. “Të dielën kemi derbin me
Elbasanin dhe unë ju siguroj që do të jetë një ndeshje e bukur, e fortë
e plot rivalitet, që do të konfirmojë gjendjen e ekipeve, punën që kanë
bërë deri tani. Duhet pranuar që ka marrëdhënie mjaft të mira midis dy
qyteteve e për pasojë edhe një bashkëpunim të ndërsjellë midis klubit
të Elbasanit dhe Shkumbinit. Kjo do të reflektohet në fushën e lojës,
duke qenë i bindur se do të jetë një lojë e fortë, pa kompromis, ku do
të mbizotërojë “fair play” gjatë 90 minutave në fushë e jashtë saj,” -
siguron sekretari i klubit bardhekaltër. Duke folur për objektivat e
ekipit të tij, ai pohon se në derbi janë të parashikuara të tri
rezultatet, pa e fshehur pretendimin që Shkumbini do të synojë edhe në
këtë takim rezultat pozitiv. Ai beson te puna që është bërë, duke qenë
i bindur te forca sulmuese e ekipit, i cili në të 4 ndeshjet e para, si
asnjë ekip tjetër, ka ditur të gjejë rrugën e rrjetës. “Shkojmë në
Elbasan, ku do të kemi përballë një kundërshtar me përvojë e me
elementë cilësorë, që e kanë filluar mirë sezonin. Për ne, është një
ndeshje e radhës dhe na takon të tregojmë vlerat tona më të mira
përballë një kundërshtari të tillë me autoritetin e vendit të dytë. Do
të pretendojmë më të mirën, por gjithsesi do të jetë fusha e lojës ajo
që do të tregojë më mirë në këtë derbi të zakonshëm, që në fakt i ka
brenda të tri rezultatet e mundshme. Synimi ynë është që të bëjmë lojën
tonë, për të marrë në fund një rezultat pozitiv. E dimë që nuk do të
jetë e lehtë përballë një kundërshtari të tillë, por jam i bindur që
është punuar për këtë,” - përfundon sekretari i klubit peqinas, Astrit
Isaj.

marre nga Sport Shqiptar