Arlind Nora, apel tifozëve para derbit

Sulmuesi shpreson te kualifikimi ndaj Elbasanit në Kupë

Arlind Nora, apel tifozëve para derbit

Në transfertën e Kavajës u dëmtua, mirëpo nuk mungoi në takimin ndaj Elbasanit në
ndeshjen për kampionat. Këtë dëshirë e ka edhe për sfidën e radhës përballë verdhebluve
në ndeshjen për Kupën e Shqipërisë, në të cilën dëshiron me gjithë zemër që të arrijë
kualifikimin. Që kur i është bashkuar ekipit me lojën dhe shpirtin e garës që ka treguar ka
arritur të fitojë zemrat e të gjithë tifozëve peqinas dhe padyshim është bërë një lojtar bazë i formacionit të Maganit. Ekipi i Elbasanit ka qenë një ndër ekipet në të cilat futbollisti ka luajtur, mirëpo paralel me respektin që ka për këtë klub detyra ndaj ekipit ku ndodhet është detyrë, prandaj edhe lojtari kërkon që të sakrifikojë gjithçka për të arritur këtë kualifikim. Për “Panorama Sport”, sulmuesi gjirokastrit shprehet: “Kemi arritur një fitore të mundimshme, por tepër të vyer në derbi për kampionat. Ky takim e ka rritur shumë moralin tek ne. Kjo fitore vazhdon që ta mbajë ekipin në objektivin e tij për të qenë pjesë e gjashtë ekipeve elitare të kampionatit. Më tej, nesër na pret një përballje akoma më impresionuese dhe me një shkallë shumë të lartë vështirësie, - vijon Nora. - Tashmë që elbasanasit, ekip në të cilin kam luajtur dhe ruaj respekt për kohën që kam qenë pjesë e tij, ka humbur shpresat për vendin e dytë, padyshim që vështrimi i tyre është Kupa e Shqipërisë. Kjo do t’i bëjë ata që të luajnë dhe të kërkojnë me çdo kusht një rezultat që do t’i çonte në 1/8 e Kupës së Shqipërisë. Nga ana jonë, edhe ne do të bëjmë çmos që më së pakti të mbrojmë rezultatin që kemi vendosur që në ndeshjen e parë dhe më tej, pse jo, të shfrytëzojmë ndonjë gabim apo të gjejmë ndonjë hapësirë në momentet që kundërshtarët tanë do të
sulmojnë me forca të shumta, për të shënuar tre gola për të arritur kualifikimin. Kam vënë re një mbështetje të madhe edhe nga tifozët tanë në takimet e fundit në veçanti në ndeshjen e kaluar të “derbit”, çka mendoj se do ta kemi edhe në Elbasan. Kjo do të na mobilizojë edhe më shumë dhe në fund shpresoj që ne dhe ata të kthehemi së bashku të gëzuar e me një kualifikim për më tej”, ka përfunduar lojtari.