Dabulla: Goli dhe fitorja, gëzim i dyfishtë

Mbrojtësi i dha tri pikët skuadrës peqinase në sfidën me Elbasanin të shtunën
Dabulla: Goli dhe fitorja, gëzim i dyfishtë
Ekipi i Shkumbinit ka arritur të marrë një trepikësh tepër me vlerë në ndeshjen që ngriti siparin e javës së 20-të kampionatit shqiptar. Ndonëse ka qenë një fitore minimale, duhet thënë se ka qenë e bujshme, pasi është arritur dy herë në një kohë tepër të shkurtër në ndeshje derbi. Këtë herë shpëtimtari dhe heroi i takimit për peqinasit ka qenë mbrojtësi energjik, Rezart Dabulla. Loja e tij plot grintë dhe me shpirt të lartë gare është duke e kthyer lojtarin në kohërat e tij të arta, ashtu sikurse vite më parë teksa shpallej kampion disa herë radhazi me ekipin e Tiranës. Vetë lojtari nuk e fsheh kënaqësinë e tij për fitoren që mban firmën e tij. Në një deklaratë të dhënë për “Panorama Sport”, ai është shprehur menjëherë se goli ka qenë një gëzim i dyfishtë për të. “Jam tepër i kënaqur nga fitorja që arriti ekipi në këtë takim. Ishte një ndeshje e vështirë, por dhe e rëndësishme për vazhdimësinë pozitive tonën në kampionat - tha në fillim mbrojtësi. - Pa dyshim që kënaqësia ime ka qenë e dyfishtë në këtë takim, pasi kam shënuar një gol që ka qenë edhe i vetmi i fitores sonë. Megjithatë, ky gol i dedikohet të gjithë ekipit, pasi ne përpiqemi të bëjmë detyrën tonë në fushën e lojës, pra të kontribuojmë të gjithë për të arritur fitoren në çdo takim. Tashmë na mbetet që të përqendrohemi të gjithë për takimin tepër të rëndësishëm të Kupës së Shqipërisë. Mendoj se ky takim do të jetë shumë i vështirë, pasi tashmë edhe Elbasani do të përqendrohet në Kupë dhe kjo do t’i vështirësojë edhe më shumë gjërat. Nuk mund të them se rezultati i pastër që kemi arritur në takimin e parë në Peqin është vendimtar, pasi takimi është i hapur. Megjithatë, ne kemi shpresa te një kualifikim i mundshëm, pasi detyra jonë kryesore është që ta ruajmë këtë rezultat, por nuk duhet harruar që shënimi i një goli të vetëm nga ana jonë i vështirëson edhe më shumë gjërat te kundërshtari. Tashmë çdo gjë i mbetet fushës së lojës”, përfundoi mbrojtësi me eksperiencë i Shkumbinit, Rezart Dabulla.