Xhyra mendon kampionatin para Kupës

Xhyra mendon kampionatin para Kupës

Nesër në stadiumin e Peqinit ngre siparin e saj java e 20-të e Kategorisë Superiore, ku ekipi vendës i Shkumbinit do të presë në një ndeshje derbi ekipin e Elbasanit. Ky takim i paraprin një tjetër takimi midis këtyre dy ekipeve, që do të zhvillohet në fushën e Elbasanit, i vlefshëm për kualifikimin në 1/8 e Kupës së Shqipërisë. Mirëpo ekipi i Shkumbinit nga ana e tij, më së pari është duke menduar për takimin e radhës në kampionat, pasi ai ka synime të qarta përsa i përket kompeticionit kampionat. Kështu mendon edhe një
ndër lojtarët lider të ekipit të Shkumbinit, mbrojtësi shtatlartë Klement Xhyra, i cili për “Panorama Sport” është shprehur: “Kjo javë na vë përpara një përballjeje tepër të rëndësishme për ne. Ekipi i Elbasanit ka zhvilluar takime të bukura dhe nuk është thyer në kampionat nga ekipe të fortë ndaj këtë do të tentojë të bëjë edhe në këtë përballje. Nga ana jonë jemi duke punuar shumë që të japim më të mirën e mundshme në këtë takim. Vijmë pas një humbjeje dhe nuk duam t’i lejojmë vetes një tjetër hap fals. Edhe ne kemi
synimet tona në kampionat ndaj dhe do të përpiqemi që të dalim të fituar në këtë sfidë. Fitorja në këtë takim mund të na rikthejë shpresat që të mbyllim këtë fazë në vendin e gjashtë. Kjo do të na ndihmonte shumë edhe për kalendarin në fazën e tretë”. I pyetur se cilës ndeshje do t’i kushtoheni më shumë, mbrojtësi thotë: “Nuk duhet që t’i ngatërrojmë këto takime. Më parë na duhet të kalojmë me sukses në përballjen për kampionat, e më pas do të mundohemi që të luajmë dhe të japim më të mirën për kupë. Ne duhet që të qëndrojmë ndër gjashtë ekipet më të mirë, ndaj dhe duhet të vlerësojmë siç duhet këtë dhe takime të tjerë pas tij. Çdo ndeshje ka vendin e saj nëse bëjmë mirë çdo gjë në takimin e kampionatit do të kemi moral edhe më të lartë në përballjen për kupë. Por tani për tani do të përqendrohemi në kampionat”,përfundoi Xhyra.

Shkumbini nuk pyet për “Lalën e madh”

Shkumbini arriti të fitojë dy herë rresht brenda 10 ditëve me Elbasanin: 2-0 në ndeshjen e 1/16 të Kupës së Shqipërisë dhe 1-0 në javën e parafundit të fazës së dytë të Kategorisë Superiore.

Golin e vetëm të takimit e realizoi ish-lojtari i Tiranës, mbrojtësi Rezart Dabulla në minutën e 4-t. Sulmuesi i Elbasanit, Skerdi Bejzade rrahu shtyllën, ndërkohë që Klement Xhyra pati mundësinë për të dyfishuar rezultatin. Për Elbasanin, ky ishte takimi i katërt pa fitore, ndërkohë që peqinasit presidentit Xhavit Ismaili (“Berluskoni i Peqinit”, - ishte një banderolë në fushë) u ngjitën në kuotën e 31 pikëve.

Shkumbini regjistroi fitoren e 12-të në 30 përballjet historike me Elbasanin (14 fitore). Në javën e fundit të fazës së dytë, Shkumbini do të luajë në kryeqytet kundër Dinamos (0-0 takimi i fazës së parë) , ndërsa Elbasani do të presë në shtëpi Vllazninë (2-1 për shkodranët takimi i parë).



E Premte, 22 Shkurt 2008 FORCA SHKUMBINI - GJITHMONE NE ZEMRAT TONA