Shkumbini lë Peqinin, sistemohet në Ulqin

Shkumbini lë Peqinin, sistemohet në Ulqin

Çdo gjë po shkon sipas programit për skuadrën e Shkumbinit, që dje pasdite ka lënë Peqinin dhe është nisur drejt Malit të Zi. Drejtuesit e skuadrës kanë mundësuar zhvillimin e përgatitjeve në qytetin e Ulqinit, ku kushtet janë shumë të favorshme. Nga kontigjenti i mëparshëm i Shkumbinit, i vetmi që nuk ka shkuar në Ulqin është mesfushori Saimir Patushi, i cili është jashtë planeve të peqinasve për pjesën e mbetur të kampionatit. Ilir Qorri dhe Rezart Dabulla janë bashkuar me autobusin e Shkumbinit në Vorë, ndërkohë që nuk kanë munguar elbasanasit Stojku e K.Dalipi, ky i fundit i shumëpërfolur në merkaton e dimrit.

Gjithashtu, nën urdhrat e trajnerit Magani do të jetë në Mal të Zi edhe gjirokastriti Arlind Nora, futbollisti i sapoblerë nga peqinasit. Me skuadrën pritet të bashkohet ditën e mërkurë edhe Erald Turdiu, i cili pret vendimin e komisionit të disiplinës në FSHF. Kështu, stërvitja e Shkumbinit do të zhvillohet në kushte mjaft të mira në Ulqin, ku momentalisht ndodhet edhe Vllaznia. Gjatë këtyre ditëve do të shkojnë në këtë qytet edhe disa skuadra të tjera të superligës shqiptare, kështu që mund të krijohet mundësia e zhvillimit të ndeshjeve miqësore, që e ndihmojnë shumë stafin teknik për stabilizimin e formacionit. Trajneri Magani dhe ndihmësit e tij duhet të jenë të kënaqur, sepse tani mund të punojnë më të qetë.


Nga SportiShqiptar