Klevis Dalipi, “violina e parë” që pritet të “dëgjohet”

Klevis Dalipi, “violina e parë” që pritet të “dëgjohet”

Atmosferë optimiste, por e përmbajtur në kampin peqinas para ndeshjes me Partizanin. Njëri nga sulmuesit e skuadrës bardhekaltërt, Klevis Dalipi, shprehet entuziast për situatën në skuadër, duke parë dhe veten në gjendjen më të mirë. “Vërej se puna vijon normalisht dhe të gjithë futbollistët janë të vendosur për realizimin e një stërvitje të fortë e me ngarkesë. Ne kemi shanse në këtë sezon për të arritur pranë skuadrave kryesuese të kampionatit”, thotë Dalipi. “Kemi përpara një ndeshje të vështirë, pasi do të luajmë me Partizanin, një nga pretendentët për titull, megjithatë kjo nuk na “tkurr”. Ecuria e qëndrueshme në javët e fundit më bind që do të luajmë për të marë pikët e plota”. Me këtë, sulmuesi kërkon të thotë se Shkumbini, pavarësisht vlerësimit që i bën skuadrës së kuqe, do të hyjë në fushë si i barabartë me të. Nuk është se ka ndonjë të fshehtë: Dalipi e shpall se si do të “sillen” ndaj “demave”: “Partizani nuk pranon të lëshojë pikë rrugës. Megjithatë ne do të japim maksimumin tonë për të marrë fitoren. E lehtë nuk është, por ne do të bëjmë punën tonë në mënyrë që të ngushtojmë sa më shumë diferencën e pikëve me skuadrat që janë më lart në renditje. Ndaj, ne do të luajmë në bllok duke iu kundërvënë Partizanit taktikisht, për të neutralizuar veprimet e individualiteteve të tij”, thotë Dalipi. Sulmuesi ka shënuar vetëm tre gola, ndërsa pritej që ai të ishte “violina e parë” në sulmin e skuadrës së Maganit. E ndien mungesën e gjatë të golit, por nuk dëshiron të “stonojë”. Eshtë kjo arsyeja që nuk kërkon trë dalë në ballë të “orkestrës”, por mjaftohet të thotë: “Dëshira për të shënuar në këtë ndeshje është shumë e madhe...”.