SHQIPERI - Hollande

Holandezet inspektojne stadiumin Loro Borici

Në përgjithësi i gjithë grupi ka kontrolluar stadiumin dhe më të sigurtit në çdo cep të tij, kanë qënë përfaqësuesit e “Sport Besi Bekteshi.Holandezët “inspektojnë” stadiumin “Loro Boriçi” dhe presin vendimin e federatës.

Shqipëri – Holandë,
ndoshta në Shkodër me 12 shtator.

Shkodër---Me sa duket mosmarrëveshjet e drejtuesve të stadiumit “Qemal Stafa” dhe Federatës së Futbollit” po vazhdojnë në favorizimin e qytetit të madh verior, për të pritur ekipe të kalibrit botëror. Kësaj rradhe është fjala për Holandezët dhe për ndeshjen që ato kanë me ne, në datën 12 shtator. Në fakt federata jonë e futbollit duhet të marrë një vendim të plotë dhe të saktë, deri me datën 12 korrik dhe pikërisht për këtë gjë, nga Holanda kanë qënë në Shkodër një përfaqësi jo vetëm nga “Federata e Futbollit Holandez”, por përfaqësues edhe nga televizionet dhe sidomos përfaqësuesit e njohur tashmë me stadiumin e Shkodrës të kanalit të madh “Sport Five” të cilët kanë të drejtën e transmetimit të ndeshjeve tona kombëtare. Kështu ishin si përfaqësues të FHF-së Erik Von Brokheren dhe Kees Buring. Për televizionin të interesuar për transmetim Andre Von Weerkerk si regjizor dhe bashkëpunëtorët Patrich de Waard dhe Robert Loubing. Kurse nga kanali i madh i transmetimit sportiv “Sport Five” ishin Volfgang Jawer dhe Christian Ludwig. Në përgjithësi i gjithë grupi ka kontrolluar stadiumin dhe më të sigurtit në çdo cep të tij, kanë qënë përfaqësuesit e “Sport Five-s” të cilët tashmë dinë çdo gjë dhe çfarë mungon dhe çfarë është mirë në “Loro Boriçi”. I gjithë grupi nuk ka dhënë shumë sqarime, por në përgjithësi stadiumi edhe me disa mungesa që dihen është pranuar si vënd ku mund të luhet futboll pozitiv dhe me një ndriçim shumë të mirë

Grupi i FHF-së është shoqëruar vetëm nga sekretari i klubit të futbollit Agim Medja dhe njëri nga menaxherët e klubit Armando Lohja. Askush nuk ka qënë i pranishëm nga Bashkia dhe nga lokalët e Shkodrës edhe për arsye që nuk e kanë ditur, sepse përfaqësuesit që inspektuan stadiumin kanë dashur të shohin realitetin vetë ashtu si kundër është.
Nga momenti i parë, duket se çdo gjë është në dorë të Federatës Shqiptare të Futbollit dhe në qoftë se ajo ka edhe pëlqimin e holandezëve të cilët nuk kishin ndonjë vërejtje thelbësore atëherë me 12 shtator me një ndriçim madhështor dhe nën brohoritjet e mijra tifozave, do të luhet në Shkodër ndeshja Shqipëri - Holandë.

Tifozet holandeze fillojne prenotimet

Tifozet holandeze kane filluar te prentojone biletat per ndeshjen kunder Shqiperise, qe luhet ne date 12 shtator. Numri i biletave qe do te kene teorikisht tifozet kundershtare eshte rreth 500, por pritet qe FSHF te toleroje dhe t’u jape me shume mundesi miqve. Mendohet qe te pakten te jene 1 mije holandeze qe do te zbresin ne stadiumin “Qemal Stafa” ne 12 shtator, nderkohe qe mendohet, qe ata te qendrojne ne anesoren nga ana e liqenit. Kjo pjese do te jete e sigurise se larte dhe pritet te survejohet nga policia shqiptare. Nuk mendohet qe tifozet holandeze te krijojne probleme, nderkohe qe prenotimet jane duke i bere ne Federaten Holandeze te Futbollit.

Bariç shpall listen anti-Holande. Rikthehet Cana

Ndeshja me Holandën ka “nisur”. Të paktën ajo në letër. Që luhet me lista lojtarësh. Ndërsa trajneri Van Basten pret të premten të shpallë listën përfundimtare, pas asaj paraprake me 29 lojtarë të publikuar të martën, tekniku i kuqezinjve Oto Bariç e shpalli atë 24 orë përpara se holandezi. Emrat dihen. Janë atë që gjithmonë kanë qenë edhe në ndeshjet e fundit. I vetmi ndryshim nga të thirrurit me Maltën është rikthimi i Lorik Canës dhe mungesa për shkak të pezullimit me dy kartonë të verdhë i Ervin Skelës.

Oto Bariçi e di se ka përpara një ndeshje shumë të rëndësishme, që të paktën atij i kujton atë me Bullgarinë, kur u ngrit nga shtrati i sëmurë për të marrë pikën e madhe në Sofie e provokuar shkarkimin e trajnerit Hristo Stojçkov. Tekniku kroat e ka thënë hapur objektivin e tij. Do të ishte i kënaqur edhe me një barazim. Nëse ndaj Maltës do të luajmë tërësisht në sulm duke luajtur me dy sulmues të mirëfilltë, ndaj Holandës loja jonë do të ketë një fizionomi mbrojtëse, dhe me një sulmues”, - u tha ai gazetarëve në konferencën e tij të zakonshme për shtyp në hotelin “Adriatik”, përpara ndeshjes me Maltën të fituar 3-0.

“Kundër Holandës duhet të kemi shumë kujdes kur kundërshtari të marrë iniciativën”. Lista anti-Holandë nuk ka të fshehta brenda saj dhe emrat e thirrur nuk përbëjnë më surprizë. Dyshja e portierëve është tashmë një gjë e “vjetër”: Arjan Beqaj dhe Isli Hidi. Beqajt i djegin ende dy golat e pësuar në Holandë, që janë dhe të fundit që “njollosën” portën e tij, kur ka katër ndeshje zyrtare pa pësuar gol.

Edhe reparti i mbrojtjes është i njëjtë” : Armend Dallku, Nevil Dede, Erjon Xhafa, Debatik Curri, si dhe talenti i ri, Kristi Vangjeli. Reparti i mesfushës ka emra të njohur: kapiteni Altin Lala, Devi Mukaj, Klodian Duro, Lorik Cana, Ervin Bulku, Altin Haxhi. Për llogari të mesfushës është edhe sulmuesi i Bërnlit , Besart Berisha, gjendje fizike e të cilit mbetet ende një mister. Jahmir Hyka, i cili edhe pse ndodhet në Kombëtaren “A”, është njëherësh edhe në listën e Shpresave të Bariçit.

Vija e parë nuk përbën më asnjë befasi. Qysh kur është larguar Igli Tare, katërshja e sulmit mbetet gjithmonë e njëjtë: Alban Bushit, njëherësh edhe golashënuesi më i mirë i Shqipërisë me 14 gola, Erjon Bogdani dhe Edmond Kapllani, golashënuesi më i mitë i eliminatoreve Euro 2008 (3 gola). Në repartin e avancuar është edhe Hamdi Salihi, i cili hapi serinë e golave në fitoren 3-0 me Maltën.



Lista e Kombëtares

Portier: Arjan Beqaj (Anorthosis, Qipro), Isli Hidi (Krivbas, Ukrainë). Mbrojtës : Armend Dallku (Vorskla Poltava, Ukrainë), Nevil Dede (Tirana, Shqipëri), Erjon Xhafa (Tirana, Shqipëri), Debatik Curri (Vorskla Poltava, Ukrianë, Kristi Vangjeli (Aris Selanik, Greqi). Mesfushorë: Altin Lala (Hanover 96, Gjermani), Devi Mukaj (Tirana, Shqipëri), Altin Haxhi (Ergotelis, Greqi), Klodian Duro (Tirana, Shqipëri), Lorik Cana (Olimpiku i Marsejës, Francë), Ervin Bulku (Krivbas, Ukrainë). Besart Berisha (Anglia 2,) Jahmir Hyka (Tirana, Shqipëri). Sulmues: Alban Bushit (Apollon Kallamarja, Greqi), Erjon Bogdani (Kievo, Itali), Edmond Kapllani (Karlsruhe, Gjermani), Hamdi Salihi (SV Ried, Austri).

Lorik Cana: “Holanda, më shumë se një ndeshje futbolli”“Besnik Hasi një mik i shkëlqyer”, “Arjani është ekzemplar si shok”, “Dallku ka zemër të madhe”, “Curri modern”, “Besarti perindimor në lojë”, “Rrustemaj me vlera”. Këto janë vlerësimet e Lorik Canës per futbollistet kosovare te Kommbetares, të thëna gjatë një interviste ekskluzive për Albania-Sport.com.

Lorik, shprehët keqardhjen tuaj për mungesën gjatë ndeshjes së parë me Holandën në Amsterdam, tani keni mundësinë të tregoni veten në Tiranë, kur “kursyet” edhe ndeshjen me Maltën, për të mos u dëmtuar për takimin me “tulipanët”. Ç’mund të presim nga zëvendëskapiteni Cana?

Ndeshjen me Holandën e konsideroj më shumë se një takim futbolli, por si një bashkim kombëtar midis lojtarëve dhe të gjithë tifozerisë shqiptare nga e gjithë bota. Duhet të luftojmë të gjithë së bashku për të fituar ndaj një ekipi që është një ndër më të mëdhatë në botë, dhe një prej skuadrave më të vështira që është ndeshur ndonjëherë Shqipëria. Fitoren dua ta shohim si një gëzim kombëtar dhe si një festë futbolli. Kemi rastin për ta prezantuar bukur Shqipërinë. Një fitore për mua do të ishte ideale, por dhe një rezultat pozitiv do të ishte bukur.

Keni filluar ta godisni portën nga larg, madje jeni shprehur në mediat franceze, se keni filluar të mësoheni me kënaqësinë që të jep goli. A do të kemi një gol nga Cana në ndeshjen zyrtare, kur kemi parë vetëm një të tillë në miqësore?

Gola kam realizuar disa herë me Marsejën, por nga goditje standarde, por nga loja nuk kam qenë shumë i suksesshëm. Te Marseja janë të kënaqur me lojën time dhe nuk u vënë shumë rëndësi golave, por në Shqipëri e ndjej se i duhet dhënë më shumë Kombëtares, jo se nuk e kam bërë deri tani, por e ndjej se duhet më shumë.

Ju vlerësoheni si një nga lojtarët më të mirë të këtij grupi, përse kjo “pakënaqësi” ndaj vetes?

Punën time e kam kryer gjithmonë, por nga ajo që presin prej meje duhet të arrij në një nivel tjetër.

Bariç përsërit shpesh se ka grupin më të mirë të lojtarëve që ka pasur Shqipëria, ti ndan në të njëjtin mendim me trajnerin?

Unë dëshiroj të theksoj se ky është grupi më i ri i lojtarëve që ka pasur ndonjëherë Kombëtarja, të paktën të këtyre viteve të fundit. Mundet të jetë një grup i mirë, por nuk më pëlqen të komentoj mendimet e trajnerit, pasi unë i shoh gjërat thjesht si futbollist.

Në Kombëtaren shqiptare aktivizohen një numër i konsiderueshëm titullarësh që vinë nga Kosova. Cili është vlerësimi i Canës për ta, duke nisur nga portieri Arjan Beqaj?

Arjani do të vinte te Marseja, por për shkak të disa pengesave nga klubi i tij, por dhe pse ne morëm një portier të ri, ai nuk mundi të vinte në Francë. Arjani është një portier shumë i mirë, ekzemplar si shok dhe besoj se do t’i duhet edhe për shumë kohë ekipit Kombëtar.

Armend Dallku?

Dallku është një lojtar me një zëmër të madhe dhe jep maksimumin në fushë, gabon apo s’gabon është diçka tjetër, por është një futbollist që jep gjithçka për Kombëtaren. Është një lojtar modern dhe i fuqishëm, një nga pikat e rëndësishme të mbrojtjes sonë.

Debatik Curri?

Ka vetëm një vit me Kombëtaren, por e ka treguar se e ka merituar vendin dhe fanellën. Është një lojtar i ri dhe i talentuar, vlen shumë për të ardhmen.

Besart Berisha?

Së pari më vjen keq që e humbi ndeshjen me Holandën, pasi ishte përgatitur shpirtërisht. Besarti është formuar në perëndim, është një talent i jashtëzakonshëm, shumë teknik dhe i shpejtë. Është një djalë shumë i mirë edhe jashtë futbollit. Nëse punon dhe ka fat mund të shkojë shumë larg.

Blerim Rrustemaj?

Blerimi është një lojtar, i cili në debutimin e tij të parë në ndeshjen kundër Anglisë (B) e tregoi veten se ka vlera dhe mund t’i shërbejë Kombëtares. Besoj se do t’i vijë dhe radha edhe atij.

Në ndeshjen me Holandën do t’i japë lamtumirën futbollit me Kombëtaren, Besnik Hasi, një ndër më të vlerësuarit me fanellën kuqezi. Mesazhi i Canës për të?

Besniku është një nga miqtë e mi më të mirë. Kam kaluar shumë vite më të në ekipin Kombëtar dhe më ka ndihmuar shumë në fillimet e mia. Për më tepër që të dy jemi nga Gjakova, kemi pasur një marrëdhënie të veçantë, por jo vetëm unë, të gjitha djemtë kanë pasur raporte të jashtëzakonshme me të. Një futbollist që ka dhënë një kontribut të madh. Është një ndër lojtarët e vetëm shqiptarë që ka luajtur rregullisht në Ligën e Kampioneve dhe një karrierë të shkëlqyer. E konsideroj një shembull respekti. vazhdon

Holanda i vjedh fitoren Shqipërisë. Gjyqtari Rili anullon nje gol te rregullt


Nuk mundëm të krijonim një tjetër mbrëmje të madhe, edhe pse dhamë gjithçka. Një humbje e pamerituar. Barazimi ishte më i drejtë. “Ne luajtëm shumë mirë nga pikëpamja taktike dhe luftarake. Më erdhi keq për humbjen”, - tha trajneri Oto Bariç, në fund të ndeshjes. “Nuk e kuptoj se përse u anulua goli”.

Një ndëshkim që erdhi atëherë kur të gjithë ne prisnim të merrnim rezultatin e pestë rresht pozitiv dhe barazimin e katërt në tetë takimet. Fitorja minimale e Marko Van Bastenit (gati në ekstazë kur Rud Van Nistelroi në minutën e 91) nuk ishter produkt i lojës së yjeve të tij, por ashtu si në Amsterdam një vit më parë, me ndihmën e arbitrit. Nëse izraeliti Aron Jefet në ndeshjen e parë kundër “tulipanëve” nuk dha të paktën tri penallti të pastra, anglezi Rili, në takimin e dytë kundër tyre, anuloi një gol krejtësisht të rregullt të shënuar nga mbrojtësi Mario Melshiot në portën e tij, në fund të pjesës së parë. Gjithsesi kjo mund të quhet një tjetër gafë e tij

“Nuk është rezultat i merituar, pasi Shqipëria luajti shumë mirë përballë një kundërshtari të madh. Shqipëria krijoi shumë raste”, - pohoi Bogdani, pas përfundimit të takimit. “Barazimi ishte më i drejtë. Shqipërisë nuk i mungoi asgjë”.

Një pjesë e parë e madhe e ndërtuar me zgjuarsi nga tekniku i Shqipërisë, Oto Bariç dhe e ekzekutuar në mënyrë perfekte nga të të gjithë lojtarët. Kronika flet tërësisht për kuqezinjtë. Nga minuta e parë, kur luajtëm topin e parë. Duro merr faullin e parë, ndërsa në minutën e 7-të, Shqipëria ishte pranë golit, kur Bogdani goditi fuqishëm një top brenda zonës të vogël, që u përplas në trupin e Andre Oter. Në fushë fillojnë të shfaqen dulet e para: Kristi Vangjeli- Robin Van Persi, Debatik Curri- Rud Van Nistelroi dhe Lorik Cana-Uesli Shnajder. Mbrojtësi i Arisit të Selanikut, Vangjeli, një nga më të mirët në fushë, doli fitues nga sulmuesit të Arsenalit, Robin Van Persi.

Në minutën e 26-të Duro tmerron të gjithë tifozët holandezë kur qeth shtyllën pingule. Në të 40’ është radha e Bogdanit që rrezikoi portën e Van Der Sarit. Kulmi i pjesës së parë ishte goli i anuluar me të padrejtë nga gjyqtari anglez Rili, kur mbrojtësi Mario Melshiot në tentativë për të larguar topin shënoi me kokë një autogol. Por, anglezi thotë jo. Në mënyrë të padrejtë Aq sa Oto Bariç në përfundim të pjesës së parë, protestoi ashpër ndaj qyqtarit anglez.

Pjesa e dytë nisi me Alban Bushin në vend të Kapllanit, i cili nuk shfaqi asgjë nga reporteri i tij. Në të 69’ Duro i lë vendin Haxhit. Loja merr të të tjera ngjyra. Rrezikojmë më shumë, jemi më afër portës. Por, Cana, në një mbrëmje shumë të lodhshme dhe nervoze, ndoshta dhe nga mbulimi i rreptë i Shnajderit humbi logjikën dhe në të 87’ ndëshkohet me karton të kuq. I panevojshëm. Një gjest i tepruar i mesfushori të Marsejës ndaj Van Nistelroi. Si për të ndjellë minutën fatale 91. Golin e Holandës. Atëherë kur të gjithë prisnin fishkëllimën e anglezit Rili. Xhon Van Bronkost rrëmbeu një top në të majtë të sulmit të holandezëve, kaloi Dallkun, u fut në zonë duke i dhënë një pas të artë Rud Van Nistelroit, që midis Dedes dhe Currit lëshoi diagonalisht topin drejt portës, për të thyer pas katër ndeshjes Arjan Beqaj, i cili ishte në një tjetër ditë të mirë.

Historia kundër Shqipërisë

Shqipëri-Holandë, një përballje që u rikthye në Tiranë pas 43 vjetësh, kur për herë të parë dhe të fundit në “Qemal Stafa” (atëherë gjysma e këtij aktual) dy ekipet u ndeshën më 25 tetor 1964. Ballafaqimet me “tulipanët” kanë qenë gjithmonë të hidhura: katër ndeshje, katër humbje.

Kështu ndodhi edhe në takimin e parë, më 24 maj 1964, kur Shqipëria humbi 2-0 në Fejënord, për eliminatoret e Kampionatit Botëror Angli 1966, kur pas mbyllëm pjesën e parë në barazim 0-0, pësuam dy gola brenda katër minutave: Shrijvers (48’) me penallti (e dyshimtë sipas portierit të përfaqësueses sonë, në atë takim, Mikel Janku) dhe Muler në të 52’.

Edhe në ndeshjen e kthimit, më 25 tetor 1964, humbëm me të njëjtin rezultat 2-0, por kësaj radhe holandezët shënuan golin e parë, tri minuta pas fillimit të takimit (Van Nee, 3’) dhe golin e dytë, tri minuta para përfundimit të ndeshjes (Geurtsen, 87’). Në takimin e tretë të zhvilluar në Amsterdam, më 11 tetor 2006, për eliminatoret e Kampionatit Europian 2008, tradita nuk ndryshoi: pësuam dy gola, (të parin e shënoi Van Persi), ndërsa të dytin e pësuam me autogol (Nevil Dede), por në ndryshim nga dy ballafaqimet e vitit 1964, në takimin e tretë kundër “tulipanëve” shënuam me anë të Debatik Currit golin e nderit.

Takimi i djeshëm, i katërti kundër Holandës duhet të përfundonte të paktën në barazim 0-0. Por fati nuk e desh, madje as arbitri anglez Majk Rili. Gol i anuluar për Shqipërinë në pjesën e parë dhe një gol fatalisht i shënuar nga Holanda në minutën e 91, nga sulmuesi i Realit të Madridit, Rud Van Nistelroi.

Jashtë fushës

Atmosfera - “Shqipëri, Shqipëri!”. Këto ishin thirrjet e zakonshme në gjatë gjithë ditës së djeshme në Tiranë. Ethet e ndeshjes së shumë pritur Shqipëri-Holandë, së pari nisën jashtë stadiumit. Kryeqyteti shqiptar u shndërrua dje në një pikë referimi për gjithë shqiptarët kudo në botë, dhe për më tepër pikëtakim krenarie i të gjithë tifozerisë kuqezi të ardhur nga të gjitha rrethet e Shqipërisë, por dhe nga Kosova e Maqedonia. Atmosfera ishte e këndshme, emocionet të mëdha. “Shqipëri, Shqipëri!”. Të gjithë me shpresë te fitorja. Të uruar në të gjitha dialektet e shqipes.

Tifozët – Të zjarrtë. Të zhurmshëm. Të ngjirur. Të nxehur në kulm kundër Holandës. Një rast që nuk përsëritet shpesh. Të veshur kuqezi për të sfumuar ndonjë “njollë” portokalli ata ishin “dekori” më i bukur i Tiranës. Në një ditë të ngrohtë si ajo e djeshmja. Të gjithë në aventurën për të qenë pjesë e ndeshjes, të paktën në rrugë. “Qemal Stafa”, nuk mund të pranojë më shumë se 10 për qind të atyre që dje manifestuan në rrugët kryesore që të çonin drejt Stadiumit Kombëtar. Shumë e kishin ëndërruar një biletë. Por, edhe pa të, u mjafton të dëgjojnë jehonën që vjen nga stadiumi për tu treguar “Ultras kuq e zi” deri në pritje të pëfundimit të takimit. Kalimi i autobuzit të Kombëtares për të çuar futbollistët në stadium i çmendi të gjithë. I përshendëtën të gjithë lojtarët duke treguar një gisht lart, si shenjë “1”-sh, atë të fitores.

“Cana” – Fanellat me emrin e njërit prej lojtarëve më të dashur të Kombëtares, mesfushorit Lorik Cana, ishin edhe më të shumtat në “dyqanet” e rrugës. Nuhatje ekspertësh të tregut dhe njohës të filozofisë së tifozëve. “Më jep një Cana!”, - ishte një kërkesat e përsëritura dhjetra herë. Rivaliteti me mesfushorin e Marsejës, e bënte vetëm Bogdani, por jo Erioni në fushën e lojës, por fanela më emrin “Bogdani” me numër 22, edhe pse ato ishin thjesh disa imitime “Umbro”, të kushedi kujt kompanie turke apo kineze. Gjithsesi ia vlente ta koleksionojë një. Qoftë edhe për fat në ndonjë ndeshje kalçetoje.

Biznez – Okazion ideal. Ndeshjet e Kombëtares gjithmonë i kanë shërbyer biznesit vendas për të nxjerrë superfitime nga shitjet. Tregëtarë profesionistë kishin angazhuar shitësa ambulantë, të papunë apo dhe të afërm të tyre për të shitur shaje, bluza, borie, flamuj, kapele. “Dyqanet” të tilla ishin të pranishëm thuajse çdo 100 metra në bulevardin “Dëshmorët e Kombit”. te sheshi “Nënë Tereza”, Pallati i Kongresve, Piramida, Parku Rinia e deri te kryqëzimi i “21 Dhjetorit”. “Hajde kapele me çmim të arsyeshëm. Dhjetë kapele sa një biletë karshie!”.

“...me Pacollin”- Ky ishte një nga mesazhet e bluzave të tifozëve kosovare nga ana e përparme e tyre, sigurisht të sponsorizuara nga miliarderi kosovar, Bexhet Pacolli, i cili bëri të mundur edhe blerjen e 1000 biletave në tribunën D3 të stadiumit “Qemal Stafa” për tifozët e grupit “Tifozat Kuq e Zi”. Bosi i gazetës “Lajmi”, nuk ka humbur shumë, madje ka fituar disa herë. Rritjen e prestigjit në Kosovë. Shqipëri-Holandë është një rast i shkëlqyer.

Makinat– Rast i madh për të tejkaluar e thyer ca rregulla. Me borie në maksimum, me njerëz mbi kapacitetin e lejuar. Qysh në mëngjes në bulevardin kryesor u panë autovetura dhe furgona të mbuluar me flamuj. Me bekimin e policisë (“Le të bëjnë ç’të duan, nuk duhet prishur festa”) autokolona e pafundme e makinave bëri disa herë xhiro në bulevardin kryesor të Tiranës, duke çuar në “ekstazë” edhe më indiferentët ndaj futbollit. Rreth 15 autobuzë me targa maqedonase, nga Tetova e Shkupi, me targa kosovare, nga Prishtina (e Currit, Beqajt) e Gjakova (e Canës dhe Besnik Hasit) kishin pushtuar pjesën e mitingjeve të sheshit Skëndërbej.

Tatuazhet– Të paimagjinueshme. Sfiduese. Imagjinata e imazhit që ato sillnin mund të konkurronin edhe me makiazherët më të mirë të studiove më të mëdha. Variacionet grafike me ngyrat kuq e zi në fytyrat e ultrasve ishin të jashtëzakonshme. Pjellë e fantazisë shqiptare. Një galeri arti në natyrë. Një kolazh i fotove të tyre do të ishte i denjë për një ekspozitë.

Holandezët- Shifrat e para bënin fjalë për rreth 500 tifozë holandezë. Paraditen e djeshme të shpërndarë në rrugët e kryeqytetit dukeshin të paktë, ashtu në grupe të vogla. Të veshur në ngjyrën e tyre tradicionale, portokalli, ata konsumuan sasi të pafundme birre në lokalet kryesore të bllokut (lum pronarët e lokaleve), ndërsa përqendrimi më i madh i tyre ishte pranë Taivanit. Qejflinj të mëdhenj holandezët. Të mësuar në ndjekje të Kombëtares së tyre. As duan t’ia dinë se ku janë: në Romë, Paris, Berlin, Londër apo Tiranë. Mbeten njëlloj. Tifozë. Çuditërisht shumica e tifozëve të “tulipanëve” ishte në një moshë jo fort të re. Midis tyre edhe “ultrase” femra, por dhe ndonjë që ecte me ndihmën e një paterice. Të çmendur pas futbollit.

Policia- E rreptë. Autoritare. Ndonjëherë edhe me teprime. Ashtu siç edhe kishte paralajmëruar ishte treguar e kujdesshme për mbarëvajtjen e ndeshjes duke krehur e survejuar jo vetëm sheshin “Italia” pranë stadiumit “Qemal Stafa”, por dhe të gjithë rrugët hyrëse nga “Hotel Sheraton”, Televizioni Shqiptar dhe Rruga e Elbasanit. Skela të firmës “Sula” përbënin edhe portat hyrëse të lëvizshme, të kontrolluara rreptë nga uniformat blu.

Brenda fushës

17:30- Mbërrijnë shikuesit e parë në “Qemal Stafa”, por dhe dëgjohen brohoritjet e para “Shqipëri, Shqipëri”.

18:30 – Kombëtaja jonë mbërrin në stadium. Futbollistët dalin me kostumet zyrtare, por tifozët nuk i njohin, pasi i kujtuan si holandëzë. Kosovari Curri përshendet tifozat “kuqezi” dhe nisën brohoritjet. Bariç befasohet nga shikuesit. Numri më i madh që ai ka parë në impiantin ndërkombëtar të Shqipërisë.

18:45 – Holanda zbret në fushë. Të githë të veshur me të bardha. Van Basten dhe ndihmësit e tij me kostume.

19:00 – 70 përqind e stadiumit është e mbushur. Mbizotëron ngjyra e kuqe.

19:05- Van Basten jep intervist për televizionin holandez RTL 4. 60 gazetarë holandezë janë të pranishëm në “Qemal Stafa” , të mbi 20 gazetave e televizioneve të ndryshme.

19:20 – Shoë në “Qemal Stafa”. Një grup balerinash, rreth 40 vajza të veshura kuqezi vallëzojnë në ritme moderne. Van Basten vëtëm buzëqesh, teksa i ka shumë pranë.

19:25 – Tifozët holandëzë sistemohën në tribubën D1. Janë reth 400 të veshur të gjithë portokalli. Pak banderola dhe një flamur i madh holandez.

19:45- Një grup prej 40 djem e vajzash të veshura me ngjyra rë ta bardha mbajnë një pishtar për nder të Nënë Terezës duke vrapuar në pistën e stadiumit. Komentatori Veli Rada reciton një poezi të shrkuar nga Nënë Tereza.

20:05- Futbollistët dalin në nxehje. Kuqezinjtë brohoriten, ndërsa portokallinjë fishkëllehen. Ovacione të mëdha.

20:28 – Besnik Hasi, futbollisti kosovar që dje i dha lamtumirë Kombëtares hyn në fushë. Brohoritet nga të gjithë. Takohet me Dukën.

20:35 – Tribuna VIP popullohet. Presidenti Topi, kryeministri i Kosovës, Agim Çeku, ministri Pango, e të tjerë.

20:38- Zhvillohet ceremonia për Besnik Hasin. Presidenti Duka i jep medaljen e mirënjohjes, dhe një çmim të tillë kosovari që luajti për 7 vjet me Kombëtaren shqiptare merr edhe ne Qeveriae Kosovës.

20:42- Ezekutohen himnet kombëtare të dy ekipeve. Stadiumi është plotësisht i mbushur.

20:45 – Nis ndeshja.




https://www.youtube.com/watch?v=gA5Lj8NaIsY

Rili habit vëzhguesin e UEFA-s. Edhe Van Basten: Goli, i rregulltVëzhguesi i UEFA-s, francezi Mark Bata u ka pohuar shoqëruesve shqiptarë se nuk i kishte kuptuar disa vendime të gjyqtarit Majk Rili në fitoren 1-0 të Holandës përballë Shqipërisë. Madje, ai kishte mbetur i habitur prej tyre. Episodet e diskutueshme, që janë kundërshtuar ashpër edhe nga tifozët e pranishëm në "Qemal Stafa", kanë vendosur fatin e ndeshjes. Një humbje e pamerituar, e cila ka nxjerrë në dukej paaftësinë e "bilbilit" anglez, por edhe ka konfirmuar frikën e trajnerit kuqezi, Oto Bariç: ekipet e vogla janë gjithmonë të penalizuara përballë të mëdhave.

Në momentin që UEFA caktoi gjyqtarin Majk Rili për ndeshjen eliminatore të Euro 2008 ku Shqipëria priti Holandën, mediat kanë trumbetuar rrezikun që mund të vinte nga anglezi. Në karrierën e tij, "bilbili" ka ndikuar (me ose pa dashje) në rezultatin final të disa ndeshjeve, duke bërë armiq në të katërta anët e Evropës. Listës së tij të zezë i është shtuar edhe vendi ynë, duke e privuar Shqipërinë nga një barazim historik me Holandën, pse jo edhe nga një fitore shokuese. Por, këtë herë me arbitrimin e tij, Rili nuk ka lënë pa fjalë vetëm tifozët dhe drejtuesit e federatës, por edhe personin e caktuar nga UEFA për ta vëzhguar: francezin Mark Bata. Ky i fundit ka pohuar në konfidencë te shoqëruesit e tij shqiptarë se ka mbetur i habitur në lidhje me disa vendime, të cilat në fund kushtëzuan rezultatin e ndeshjes. "Në fund të ndeshjes me Holandën, vëzhguesi i gjyqtarëve i përcaktuar nga UEFA, francezi Bata ishte shprehur i habitur në lidhje me disa vendime të gjyqtarit Rili", kanë bërë të ditur burime pranë Federatës Shqiptare të Futbollit. "Ai nuk kishte kuptuar arsyen e anulimit të autogolit të Melkiot, pasi ndaj mbrojtësit holandez nuk ka pasur asnjë ndërhyrje të gabuar". Rili, që shumë herë ka qenë në qendër të vëmendjes për gjykim jo-objektiv, nuk ishte i saktë as në momentin e kartonit të kuq të Canës. "Vëzhguesi u ka pohuar shoqëruesve shqiptarë se ishte i paqartë edhe rreth episodit që solli kartonin e kuq të Canës", vazhduan burimet. Duket se edhe në këtë pikë francezi Bata kishte të drejtë: dy lojtarë që shtyhen, njëri (nga ekip i vogël) nxirret me karton të kuq, ndërsa tjetri (nga ekip i madh) ndëshkohet vetëm me karton të verdhë. "Tjetri" në këtë rast është Rud van Nistelroi, që pak minuta pas daljes së Lorik Canës nga fusha (në minutën e parë shtesë nga 5 të akorduara), ka shënuar golin deciziv, atë të fitores për holandezët. Vëzhguesi i institucionit që drejton futbollin në Evropë, mësohet t‘i ketë kërkuar gjyqtarit anglez edhe arsyet e mbylljes së lojës dy minuta përpara afatit të përcaktuar. Megjithatë, Rili pretendonte se nuk e kishte mbyllur takimin për shkak të fishekzjarrit që plasi mbi kokën e Melkiot, por sepse koha shtesë e akorduar prej tij kishte përfunduar.

Van Basten: Autogoli i Melkiot, i rregullt

Dyshimet në lidhje me faktin se goli i Shqipërisë ishte i rregullt i ka hedhur poshtë edhe trajneri Marko van Basten. Menjëherë pasi ka mbërritur në Holandë, drejtuesi i stolit të "tulipanëve" ka qenë i ftuar në një televizionin vendas, ku ka parë përsëritjen e momentit të autogolit të Melkiot, që është anuluar nga gjyqtari Rili. Sipas të përditshmes më të madhe, "De Telegraaf", pasi ka vëzhguar me kujdes pamjet, Van Basten është bindur se goli i Shqipërisë ka qenë plotësisht në rregull. E njëjta gazetë citonte fjalët e legjendës holandeze, në lidhje me tri pikët e marra në Tiranë: "Goli i kundërshtarëve duket i rregullt, pasi ndaj lojtarit tonë nuk ka pasur asnjë ndërhyrje që mund të penalizohej. Megjithatë, ne ishim me fat që arritëm të fitonim". Ndërkohë, në largimin e tij nga stadiumi "Qemal Stafa", trajneri nuk ka preferuar të flasë për mediat shqiptare, por vetëm për ato holandeze. Ai ka vlerësuar se disiplina taktike ka ndikuar në marrjen e një rezultati pozitiv, duke theksuar edhe se lojtarët shqiptarë kanë përdorur të gjitha hiletë e mundshme. "Ishim shumë të disiplinuar në fushën e lojës dhe me këtë fitore 1-0 bëmë një hap të madh përpara drejt fazës finale të Evropianit", ka deklaruar Van Basten. "Shqipëria është një skuadër që nuk duhet nënvlerësuar. Ata janë kundërshtarë të vështirë që luajnë një futboll fizik dhe përdorin të gjitha hiletë e mundshme. Gjithsesi, lojtarët e mi ruajtën qetësinë, nuk ndodhi asgjë e jashtëzakonshme dhe në fund arritëm të merrnim tri pikë shumë të rëndësishme. Kur luan si profesionist, në fund edhe fati është nga ana jote". Në fund, trajneri ka shpjeguar edhe lojën e dobët të holandezëve: "Për të zhvilluar një ndeshje tërheqëse nevojiten që të dyja skuadrat të dëshirojnë të luajnë futboll. Por, kundërshtarët tanë ishin shumë të tërhequr në mbrojtje dhe kjo shkaktoi një situatë shumë të vështirë për ne".