Okuibili do me çdo kusht golin

Emerju Okuibili është lojtari i dytë i huaj, i cili i është bashkuar ekipit të
Shkumbinit në këtë merkato të bujshme. Është vetëm 21 vjeç dhe luan
në rolin e sulmuesit. Ai ka luajtur më parë në Kategorinë e Parë bullgare,
ku ka arritur të shënojë edhe 12 gola. Tashmë ky lojtar është pjesë e
ekipit të Shkumbinit dhe ka zhvilluar dy ndeshje me të, ku në të parën ka
hyrë si zëvendësues në ndeshjen ndaj Teutës së Durrësit dhe në të
dytën ka luajtur si titullar kundër ekipit të Flamurtarit të Vlorës. Në të dyja
ndeshjet, loja e lojtarit është pëlqyer shumë nga tifozët e shumtë që e
kanë ndjekur atë dhe padyshim që tashmë prej tij pritet të tregojë vlerat
reale, duke i dhënë ekipit edhe golin në ndeshjet që ai zhvillon. “Në Peqin
kam gjetur ngrohtësinë dhe ndjehem shumë mirë. Më vjen mirë që tashmë
mund të aktivizohem pasi kam shumë dëshirë të luaj dhe të jap më të
mirën për Shkumbinin. Kam zhvilluar dy ndeshje dhe mendoj se jam
paraqitur mirë, megjithatë ende kam shumë për të punuar. Në dy ndeshjet
që kam luajtur kemi arritur të marrim dy pikë edhe pse në ndeshjen e
fundit në Peqin duhet të kishim arritur të fitonim. Megjithatë, e rëndësishme
është që nuk kemi pësuar humbje në të dyja këto ndeshje. E di që
ndeshja e ardhshme është sërish e vështirë. Ende nuk e njoh mirë kampionatin
shqiptar, por mendoj se do të ambientohem shpejt dhe shpresoj
që t’i shërbej ekipit. Shpresoj që në ndeshjet e ardhshme t’i shërbej ekipit
me golat e mi ashtu sikurse i kam shërbyer edhe kampionatit bullgar.
Shpresoj që golin ta gjej që në ndeshjen e radhës kundër Skënderbeut.
Mendoj se këtë gjë do t’ia arrij edhe me mbështetjen e shokëve të
skuadrës”,- ka përfunduar lojtari nigerian, Okuibili.

Marre nga gazeta Panorama Sport e Shkruar nga
Lulzim Resuli