Byzhytit i pëlqen mesfusha, por s’bën naze

Byzhytit i pëlqen mesfusha, por s’bën naze
Në takimin e Durrësit u vu re se një ndër lojtarët që kënaqën me lojën e tyre ishte mesfushori lushnjar, Alban Byzhyti. Spostimi i tij në qendër të mesfushës bëri që ai t’i jepte një volum të madh lojës së ekipit me organizimin e tij të kënaqshëm në mesfushë. Në takim e radhës në kampionat, ky lojtar pritet të jetë sërish në fushën e blertë në pozicionin e organizatorit, një vend që duket se e josh lojtarin dhe e bën të japë 100 % të mundshmen e tij. Për “Panorama Sport” lojtari shprehet se
ndihet mirë në këtë pozicion,por shton se ai do të pranonte çdo rol tjetër. “Jam tepër i kënaqur me zgjedhjen që më ka bërë trajneri. Ky mendoj se është një pozicion i kënaqshëm, ku unë mund të shprehem lirshëm dhe në kapacitetin tim më të mundshëm.Shpresoj që edhe në këtë ndeshje të radhës kundër Flamurtarit të jap maksimumin dhe të kënaq t’i gjithë sportdashësit peqinas”. Më tej në lidhje me ndeshjen e radhës kundër vlonjatëve, lojtari shprehet: “Ndeshja e radhës ndaj Flamurtarit është një ndeshje e vështirë, pasi edhe ekipi i Vlorës është një ekip i fortë dhe duhet respektuar për atë çka shpreh në fushën e lojës. Nuk kemi asnjë arsye ta nënvleftësojmë këtë ekip, por dua të them se java e pushimit na ka rigjeneruar dhe na ka bërë që të jemi të karikuar për të zhvilluar një ndeshje të madhe.
Faktor tjetër, tepër i rëndësishëm është që luajmë në fushën tonë përpara tifozëve të zjarrtë, ndaj dhe në fushë gjendemi
“12” përballë 11 lojtarëve të Flamurtarit. Kjo na bën që të mos bëjmë një hap fals, por të arrijmë ta fitojmë këtë takim. Deri
tani kemi pasur vazhdimësi në dy ndeshjet e zhvilluara në fushën tonë prandaj duam që ta ruajmë këtë vazhdimësi pse
jo në të gjithë këtë kampionat”, - ka përfunduar mesfushori lushnjar Byzhyti.